Таиланд қироли Маҳа Важиралонгкорннинг 44 ёшли қизи малика Бажракитиябҳа юраги билан боғлиқ муаммолар туфайли ҳушидан кетганидан кейин уч ҳафтадан кўпроқ вақт давомида комада қолмоқда. Бу ҳақда қироллик суди матбуот хизмати баёнотига таяниб, Reuters хабар берди.
Таиланд қиролининг тўнғич қизи 15 декабрь куни микоплазма инфекциясидан келиб чиққан яллиғланиш оқибатида юзага келган оғир юрак аритмияси туфайли ҳушидан кетган.
«Шифокорлар дори-дармонлар билан таъминлашда, юрак, ўпка ва буйраклар фаолиятини қўллаб-қувватлаш учун асбоб-ускуналардан фойдаланишда давом этмоқда. Улар маликанинг аҳволини диққат билан кузатган ҳолда антибиотиклардан фойдаланишмоқда», — деди қироллик саройи.
Малика Бажаракитябҳа шимоли-шарқдаги Накхонратчасима провинциясида ўз итларини мусобақага тайёрлаётганда касал бўлган. Дастлаб у провинцияда даволанган, кейин вертолётда Таиланд пойтахти Бангкокка олиб кетилган. Малика қирол Важиралонгкорннинг расмий унвонлари ва тахтга чиқиш ҳуқуқига эга бўлган уч фарзандидан бири бўлиб, Таиланд тожи учун энг кўп даъвогар ҳисобланади. Бироқ қирол ҳали расман меросхўр тайинлагани йўқ, шунингдек, малика тахтга ўтириш истиқболи ҳақида ҳам расмий муҳокамалар бўлмаган.
Малика Бажаракитябҳа ҳуқуқшунослик бўйича магистр, халқаро муносабатлар йўналишида бакалавр ва ҳуқуқшунослик доктори даражасига эга. У Таиланднинг БМТдаги доимий вакили бўлган ва 2006 йилдан бери Таиланд Бош прокуратурасида ишлайди, ҳозирда Удон Тани провинцияси Бош прокуратурасида фаолият олиб боради.
Изоҳ (0)