Украина президенти Владимир Зеленский Россия президенти Владимир Путиннинг Рождество муносабати билан сулҳ эълон қилиш ҳақидаги таклифига ўз муносабатини билдирди. Украина етакчиси фикрича, Россия шу баҳона остида Украина ва Европага қарши «тажовузнинг янги тўлқини»га тайёрланмоқда.
Зеленскийнинг фикрича, Россия чегара чизиғида ўз позицияларини кучайтириш учун жимжитлик режимидан фойдаланмоқчи. «Улар Рождестводан ниқоб сифатида фойдаланиб, йигитларимизнинг Донбассдаги юришларини бироз вақтга бўлса-да, тўхтатмоқчи ҳамда техника, ўқ-дори ва сафарбар этилганларни бизнинг позицияларимизга яқинроқ олиб бормоқчи», — деди Украина президенти ўз видеомурожаатида.
Дастлаб Рождество муносабати билан ярашувни патриарх Кирилл таклиф қилганди. Путин шундна кейин жанговар тўқнашувлар чизиғи бўйлаб ўт очишни тўхтатиш режимини жорий қилишни буюрди ва Украина томонини ҳам шундай қилишга чақирди. Россия Мудофаа вазирлиги топшириқни бажаришни бошлаганини маълум қилди.
Украина ҳукумати дастлаб ташаббусга ишончсизлик билан қаради. Хусусан, Украина президенти офиси раҳбари маслаҳатчиси Михаил Подоляк таклифни «сурбетларча қурилган қопқон ва пропаганда» деб атади. Ташқи ишлар вазири Дмитрий Кулеба Киев ташаббусни жиддий қабул қилмаслигини айтиб, Зеленский аввалроқ «ўнта қадамдан иборат аниқ-равшан тинчлик формуласини таклиф этгани»ни эслатди.
Европа ташқи сиёсаий хизмати расмий вакили Петер Стано Евроиттифоқ эълон қилинган ўт очишни тўхтациҳга ишонч билан қарамаслигини айтди. Унинг фикрича, бу «Россиянинг захираларни тўлдириш, қўшинларини қайтадан гуруҳлаш ёки путур етган халқаро обрўсини қайта тиклашга уринишига ўхшайди».
БМТ бош котиби вакили Стефан Дюжаррик ташкилот жанговар ҳаракатларни тўхтатиш эҳтимолини доим олқишлашини айтди. Шу билан бирга, у БМТ «бу урушнинг халқаро ҳуқуқ ва БМТ уставига мувофиқ якунланиши» тарафдори эканини таъкидлаб, ташкилот бу мақсадга эришишда кўмак кўрсатишга тайёрлигини билдирди.
Изоҳ (0)