Россия Энгельс аэродромидан самолётларини кўчирди. Британия разведкаси бунинг оқибатини маълум қилди

Британия разведкаси Россия самолётларининг Энгельс аэродромидан кўчирилиши Украинага зарба беришда қандай таъсир қилишини прогноз қилди.

Разведка маълумотига кўра, Россия узоқ масофага учувчи Ту-95МС оғир бомбардимончи ва Ту-22М3 ўрта бомбардимончи самолётларини Россиянинг Узоқ Шарқига кўчирган. Бунга Украинанинг 5 ва 26 декабрь кунлари Энгельс авиабазасига зарба бергани ва оқибатда уч ҳарбий ҳалок бўлиб, Россия самолётлари шикастлангани сабаб бўлган.

«Россия узоқ масофаларга учувчи самолётларни Украинадан узоқроқда жойлашган аэродромларга тарқатиб юбориш орқали авиазарбага жавоб берган бўлиши мумкин», — дейилади Британия Мудофаа вазирлиги ҳисоботида.

Бироқ Россия Украинага қанотли ракеталар билан зарба беришда давом этиши, чунки қуроллар 5 минг километр масофадаги объектларга тегиши мумкинлиги айтилмоқда.

«Бироқ авиатехникани турли жойдан бошқариш техник хизмат кўрсатишда қўшимча босимга сабаб бўлади. Бу эски самолётларда чекланган парвоз соатларини янада қисқартиришга олиб келади», — дейилади хабарда.

26 декабрга ўтар кечаси Россиянинг Саратов вилоятидаги Энгельс ҳарбий аэродромида портлашлар содир бўлганди. Россия Мудофаа вазирлиги маълумотига кўра, ҳаво ҳужумидан мудофаа кучлари аэродром узра Украина дрони уриб туширган, унинг қисмлари қулашидан уч нафар аскар ҳалок бўлган.

Мавзуга доир: Аэродромга ҳужум Россиянинг Украинага зарба беришини қийинлаштириши мумкин — NYT