Жанубий Кореянинг Danuri орбитал кемаси Ой ва Ер юзасини оқ-қора суратга олди. Бу ҳақда Корея аэрокосмик тадқиқотлар институти Facebook’да хабар берди.
Кадрлар 2022 йил 24 декабрдан 2023 йил 1 январгача Ойдан 120 километр узоқликда олинган. Суратларда Ой ва Ер юзалари акс этган.
«Расмлардан 2032 йилда Ойга қўниш мумкин бўлган жойларни аниқлашда фойдаланилади», — дейилади хабарда.
Danuri ҳар икки соатда Ой атрофида айланади. У 2022 йил август ойида АҚШда SpaceX ракетасидан Ойга учирилган. Орбитал қурилма 2023 йилда илмий миссиясини бошлайди.
Аввалроқ NASA’нинг ноябрь ойида космосга учирилган янги NOAA-21 сунъий йўлдоши Ернинг юқори аниқликда суратга олганди. Коинотдан олинган суратларда Ҳимолай ва Тибет платоси, Кариб денгизи, Куба ва Багама оролларини кўриш мумкин.
Бундан ташқари NASA Ернинг Ой билан «бекинмачоқ» ўйнаётгани акс этган видеони тақдим этганди. Видеодаги жисмларнинг ҳаракати уларнинг фазодаги реал тезлигига нисбатан 900 марта тезлаштирилган.
Изоҳ (0)