Франция президенти Эммануэль Макрон украиналик ҳамкасби Владимир Зеленскийга Франция Украина армиясига AMX-10 RC зирҳли автомобилларини (улар енгил ёки ғилдиракли танклар деб ҳам аталади) етказиб беришини айтди. Бу ҳақда AFP Елисей саройига таяниб хабар берди.
«Президент AMX-10 RC енгил танкларини етказиб беришга рози бўлиб, Киевга кўрсатилаётган ҳарбий ёрдамни кенгайтиришга қарор қилди. Бу Украина армиясига Ғарбда ишлаб чиқилган танклар етказиб берилиши билан боғлиқ биринчи ҳолатдир», — дея қайд этишди Елисей саройида. Бироқ Украина қуролли кучларига қачон ва нечта AMX-10 RC зирҳли автомобиллари юборилишига аниқлик киритилмади.
Шунингдек, Украина Франциядан Bastion бронетранспортёрларини ҳам олади, деди Зеленскийнинг офиси раҳбари Андрей Ермак. Зеленскийнинг ўзи Макрон билан суҳбат чоғида енгил танклар ва Бастион зирҳли машиналарини етказиб бериш ҳақида гап борганини тасдиқлади. «Раҳмат, дўстим! Сизнинг етакчилигингиз бизнинг ғалабамизни тезлаштирмоқда», — деб ёзди Зеленский Макронга қарата.
AMX-10 RC зирҳли автомобиллари 1981 йилдан буён Франция армияси арсеналида бўлиб келмоқда, уларнинг сони 247 дан ошмайди. AMX-10 RC 105 мм калибрли қуролга эга бўлиб, у икки километр масофада ўт оча олади. Ҳозирги пайтда Франция AMX-10 RC’ни аста-секинлик билан Jaguar зирҳли автомобилларига алмаштирмоқда.
Аввалроқ АҚШ ҳукумати янги ҳарбий ёрдам пакети доирасида Украинага Bradley жанговар машиналарини юбориши мумкинлиги ҳақида хабар берилган эди.
Изоҳ (0)