Беларусь ҳар қандай вақтда Россияга Украинага шимолдан ҳужум қилиш имкониятини беришга тайёр. Бу ҳақда Украина Давлат чегара хизмати раҳбари Сергей Дейнеко маълум қилди.
Унинг сўзларига кўра, ҳозирда чегарада Россия ҳужумкор тузилмалари қайд этилмаган, бунинг ўрнида украиналик чегарачилар Россия ва Беларусь иштирокидаги «иттифоқдош» армия бўлинмалари алмашаётганини кузатмоқда.
«Ҳозирда Беларусь ҳудудидаги (асосан Украина билан чегарадан узоқроқда жойлашган Витебск вилоятидаги полигонларда) Россия қўшинларининг умумий сони 10 200 дан 10 500 тани ташкил қилади. Уларнинг бир қисми икки ҳафта ичида Россия ҳудудига кўчирилиши ва кейинчалик Донбассдаги жанговар зонага юборилиши мумкин. Уларнинг ўрнини эса Россиянинг 6-мотоўқчилар дивизияси 3-армия корпуси ҳарбий хизматчиларидан бир гуруҳи эгаллайди», — деди Дейнеко.
Давлат чегара хизмати раҳбари Беларуснинг ҳарбий инфратузилмаси рус қўшинларини жанговар мувофиқлаштириш учун ишлатилишини айтди.
«Агар таҳдид борми деб сўрасангиз? Албатта, бор. Лекин унинг ҳозирги ҳолатини ошкор этолмайман. Ҳужум такрорланиши мумкин, аммо бу муваффақиятли бўлмаслигига ишончим комил. Агар улар навбатдаги мағлубиятга тайёр бўлса, эртагаёқ ҳужум бошлаши мумкин. Аммо уларда етарли куч йўқ деб ўйлайман, январь ойида ‘иттифоқдош’ қўшинлар Украинага ҳужум қилиши даргумон», — дея қўшимча қилди у.
Аввалроқ Беларусь президенти Александр Лукашенко Украина билан чегарада ҳарбий манёврлар ўтказилаётгани сабабини айтганди. У мамлакатга ҳужум қилиш эҳтимолини сабабли ҳимоя мақсадида манёврлар амалга оширилаётганини таъкидлади.
«Тинчлик истасанг, урушга тайёрлан. Бу билан мен жамиятимизда, айниқса, интернетда Беларусь ва Россия қуролли кучларининг биргаликдаги ҳаракати ҳақидаги миш-мишларга жавоб бермоқчиман», — деди у.
Сиёсатчи мамлакатда ташқи таҳдидларга жавоб бериш учун Россия ва Беларусь қўшинларининг қўшма гуруҳи тузилганини эслатган.
Изоҳ (0)