Дунё бўйича олтиннинг ўртача нархи 2023 йилда бир троя унцияси учун 1,9 минг долларгача етиши мумкин. Бу ҳақда мутахассисларга таяниб, «ТАСС» хабар бермоқда.
Россиялик миллиардер Михаил Фридманга тегишли бўлган Alfa Bank қимматли қоғозлар бозори таҳлилий бўлим бошлиғи Борис Красноженов бозорда олтин нархи сезиларли ўзгаришини айтиб ўтди.
Унинг ҳисоб-китобларига кўра, 2023 йилда олтиннинг нархи бир троя унцияси учун ўртача 1,9 минг долларни ташкил қилади. Шу билан бирга, ўзгарувчанлик туфайли нарх 1,7 минг доллардан 2,1 минг долларгача кенг доирада ҳаракатланиши мумкин.
«Олтин баҳоси динамикасига Fed (АҚШ Федерал захира тизими) ставкалари динамикаси бўйича қисқа муддатли кутилмалар, Хитой иқтисодиётидаги вазиятнинг ривожланиши, инфляция динамикаси, геосиёсий омиллар ва глобал рецессия кутилмалари таъсир кўрсатади», — дея тушунтиради Красноженов.
Унинг сўзларига кўра, бир қатор бозор экспертлари 2023 йилда олтин нархи бир троя унцияси учун 3 000—4 000 долларгача ошишини тахмин қилмоқда.
«Агар дунё Марказий банклари инфляцияни назорат қилиш қобилиятини йўқоца, бу содир бўлиши мумкин», — дея қайд этади эксперт.
Finam IC директори Ярослав Кабаковнинг фикрича, агар Fed ставкаларни оширишда давом этса ва АҚШ иқтисодиёти рецессиядан қоча олса, доллар асосий валюталарга нисбатан мустаҳкамланишда давом этади ва олтин нархи 2023 йилда ҳам ҳозирги даражада сақланиб қолиши мумкин.
«Бироқ ўрта муддатли истиқболда юқори фоиз ставкалари иқтисодий ўсишни секинлаштиради, бу эса доллар курсини заифлаштиради ва олтин нархининг навбатдаги кўтарилишига олиб келади», — дейди эксперт.
Сентябрда олтин нархи 2020 йилнинг апрель ойидан бери энг паст даражага тушган эди. Шундан кейин унинг нархи глобал доллар курсининг пасайиши оқибатида фаол равишда қимматлай бошлади.
Нисбатан юқори нархлар сабаб ноябрь ойида Ўзбекистон етти ойдан бери биринчи марта олтин сотган эди.
Изоҳ (0)