Олтин нархи етти ойлик энг юқори даражага чиқди

Олтин нархи июнь ойидан бери биринчи марта троя унцияси учун 1,8 минг доллардан ошди. Бу ҳақда «Коммерсантъ» хабар бермоқда.

Биржа маълумотларига кўра, савдолар чоғида олтин нархи 2022 йил июнидан бери биринчи марта троя унцияси учун 1 850 доллардан ошди. Ўзининг энг юқори чўққисида олтин нархи бир унция учун 1 856,6 долларга етди.

Тошкент вақти билан 3 январь, соат 13:40 га келиб олтин нархи пасайишни бошлади ва 1 844,1 доллардан сотилди. Соат 17:40 га келиб нарх 1 840,2 долларгача пасайди.

Бугун, 4 январь соат 11:00 га келиб қимматбаҳо металл нархи 1 851,9 долларгача қайта кўтарилди. 

Декабрь ойи охирида Жаҳон Олтин Кенгаши Марказий банклар олтинни рекорд миқдорда сотиб олаётгани ҳақида хабар берганди. Расмий маълумотларга кўра, 2022 йилнинг учинчи чорагида Ўзбекистон олтин сотиб олиш бўйича дунёда иккинчи ўринда. 

Сентябрда олтин нархи 2020 йилнинг апрель ойидан бери энг паст даражага тушган эди. Шундан кейин унинг нархи глобал доллар курсининг пасайиши оқибатида фаол равишда қимматлай бошлади.

Нисбатан юқори нархлар сабаб ноябрь ойида Ўзбекистон етти ойдан бери биринчи марта олтин сотган эди. 

Айни пайтдаги қимматбаҳо металлнинг юқори нархлари Ўзбекистон Марказий банкини кўпроқ олтин сотишга ундаши мумкин.