Ўзбекистон қонунчилигида 2023 йилдан бошлаб бир қатор ўзгариш ва янгиликлар кучга киради. «Дарё» қуйида янги йилдан кучга кирадиган миллий қонунчиликдаги асосий ўзгаришларни тақдим этади.
Фуқарони текшириш учун ИИБ бўлимига олиб бориш амалиётидан воз кечилади
2023 йил 1 январдан бошлаб ички ишлар органларида босқичма-босқич «Э-патруль» тизими жорий этилиб, текшириш учун фуқарони ички ишлар бўлимига олиб бориш амалиётидан воз кечилади. Бунда барча маълумотлар жойида планшет орқали текширилиб, патруль-пост хизмати ходимлари фаолияти бодикамерадан фойдаланган ҳолда амалга оширилиши йўлга қўйилади.
Қоракўлчилик маҳсулотини етиштирувчилар учун божхона ва солиқ имтиёзлари узайтирилади
Ипак қурти уруғи, тут кўчатлари ва пилла етиштириш, пиллани қайта ишлаш ва тайёр маҳсулотлар ишлаб чиқариш билан шуғулланувчи юридик шахсларни мол-мулк ва ер солиғидан озод этиш имтиёзи 2023 йилдан 2026 йилга қадар узайтирилади. Шунингдек, қоракўлчилик маҳсулотлари ишлаб чиқарувчилари учун ер солиғи ставкасини 2018 йилда белгиланган миқдорда сақлаб қолиш муддати 2026 йилгача узайтирилади.
Ўзбекистонда фахрий донорларга бериладиган мукофот пули оширилади
«Ўзбекистон Республикаси фахрий донори» кўкрак нишони билан тақдирланган шахсларга бирйўла бериладиган пул мукофоти суммаси БҲМнинг 5 бараваридан 15 бараваригача (1,5 миллион сўмдан 4,5 миллион сўмгача) оширилади.
Саудия Арабистони фуқароларига визасиз режим жорий қилинади
2023 йил 1 январдан бошлаб Ўзбекистон ҳудудига кирган кундан эътиборан 30 кунлик муддатга ўз ёки учинчи мамлакатга учиш авиачиптасини тақдим қилган Саудия Арабистони фуқаролари учун визасиз режим белгиланади.
Ҳокимларнинг кадастр органлари ишига аралашиши тақиқланади
2023 йил 1 январдан:
- Кадастр агентлигининг ҳудудий тузилмалари фаолиятини ташкил этиш Кадастр агентлиги томонидан амалга оширилади;
- ҳудудий бошқарма ва бўлимлар фаолиятини молиялаштириш республика бюджетидан амалга оширилади;
- ҳудудий бўлимлар, Давлат кадастрлари палатаси ҳудудий бошқармалари ва туман (шаҳар) филиалларининг фаолиятига ҳокимлар томонидан аралашиш ёки таъсир ўтказиш қатъий тақиқланади.
Субсидия асосида олинган уй-жой кредити учун маблағлардан даромад солиғи олинмайди
2023 йил 1 январдан бошлаб дастлабки бадалнинг ва ипотека кредити бўйича фоизларнинг бир қисмини қоплаш учун субсидия берилган фуқароларнинг олинган ипотека кредитларини ҳамда улар бўйича ҳисобланган фоизларни тўлаш учун йўналтирилган иш ҳақи ва бошқа даромадлари ЖШДСга тортилмайди.
Айрим фаолият билан ўз томорқасида шуғулланганлар расмий банд бўлган аҳоли тоифасига киритилади
Ўзининг шахсий томорқа ер участкасида қуйидаги фаолият турлари билан шуғулланаётган фуқаролар томонидан йилига БҲМнинг камида 1 баравари (300 минг сўм) миқдорида ижтимоий солиқ тўланган тақдирда, улар расмий банд бўлган аҳоли тоифасига киритилади ва ушбу давр уларнинг меҳнат стажига қўшилади:
- чорвачилик (қорамол, қўй, эчки, от ва бошқалар);
- иссиқхона;
- паррандачилик (бедана, курка, ғоз, ўрдак);
- қуёнчилик;
- асаларичилик;
- балиқчилик;
- боғдорчилик;
- лимончилик;
- гулчилик.
Пойабзал ишлаб чиқарувчилар фойда солиғидан озод қилинади
Чарм, мўйна хом ашёси ва жунни қайта тайёрлаш, қорамолни автоматлаштирилган тарзда сўйиш, жун, қоракўл ва сунъий чармдан буюмлар, чарм-атторлик маҳсулотлари, пойабзал ишлаб чиқариш билан шуғулланувчи солиқ тўловчилар 2026 йил 1 январгача фойда, айланмадан олинадиган ва мол-мулк солиғини тўлашдан озод қилинади.
Тошкентда жамоат транспортида янги молиялаштириш тизими жорий этилади
Тошкент шаҳрида жамоат транспортининг янги тармоғи асосида ташкил этиладиган йўналишларда ташувчиларни «босиб ўтилган йўл», «йўловчи оқими» ва «сифат» мезонлари бўйича бажарилган ишлар ҳажмидан келиб чиққан ҳолда молиялаштиришнинг янги тизими босқичма-босқич жорий этилади.
Изоҳ (0)