Халқаро ҳамжамият коронавирус пандемияси ва Украинадаги уруш туфайли ҳозирда тарихий «бурилиш нуқтаси»да турибди, деди Япония бош вазири Фумио Кисида Хиросимада ўтказиладиган G7 саммити олдидан. Кисиданинг сўзлари ҳукумат раҳбари матбуот хизмати сайтида чоп этилди.
«Биз куч, ядровий қурол билан таҳдид қилиш ёки уни қўллаш орқали статус-квони бир томонлама ўзгартиришга уринишларни қатъиян рад этамиз ва қонун устуворлигига асосланган халқаро тартибни қўллаб-қувватлаймиз», — деб ёзган Кисида.
У 2023 йилда Япония G7 га раислик қилаётганини эслатди ва шунинг учун Токио мунозараларга бошчилик қилиб, дунёга «Катта еттиликнинг кучли иродасини» кўрсатиш ниятида эканини таъкидлади. Япония бош вазири дунё олдида турган муаммолар қаторида энергетика ва озиқ-овқат хавфсизлиги, ядровий қуролсизланиш ва уни тарқатмаслик, иқлим ўзгариши ва ҳоказоларни санади.
Шу билан бирга, бош вазир ўзининг Янги йил мурожаатида Токио 2023 йилда дипломатия соҳасида етакчи ролни олишини ваъда берган. У Украинадаги жанглар, коронавируснинг янги штамми тарқалиши ва собиқ ҳукумат раҳбари Синдзо Абэнинг ўлдирилиши туфайли ўтган йилни «бўронли» деб таърифлаган. Бундан ташқари Кисида Япония Иккинчи жаҳон урушидан бери энг ёмон хавфсизлик ҳолатига дуч келганини таъкидлаган.
Аввалроқ Япония Украина президенти Владимир Зеленскийни G7 саммитида онлайн форматда иштирок этишга таклиф қилмоқчилиги ҳақида хабар берилганди. Учрашув Хиросимада 19—21 май кунлари бўлиб ўтади.
Изоҳ (0)