Xalqaro hamjamiyat koronavirus pandemiyasi va Ukrainadagi urush tufayli hozirda tarixiy “burilish nuqtasi”da turibdi, dedi Yaponiya bosh vaziri Fumio Kisida Xirosimada o‘tkaziladigan G7 sammiti oldidan. Kisidaning so‘zlari hukumat rahbari matbuot xizmati saytida chop etildi.
“Biz kuch, yadroviy qurol bilan tahdid qilish yoki uni qo‘llash orqali status-kvoni bir tomonlama o‘zgartirishga urinishlarni qat’iyan rad etamiz va qonun ustuvorligiga asoslangan xalqaro tartibni qo‘llab-quvvatlaymiz”, — deb yozgan Kisida.
U 2023-yilda Yaponiya G7 ga raislik qilayotganini eslatdi va shuning uchun Tokio munozaralarga boshchilik qilib, dunyoga “Katta yettilikning kuchli irodasini” ko‘rsatish niyatida ekanini ta’kidladi. Yaponiya bosh vaziri dunyo oldida turgan muammolar qatorida energetika va oziq-ovqat xavfsizligi, yadroviy qurolsizlanish va uni tarqatmaslik, iqlim o‘zgarishi va hokazolarni sanadi.
Shu bilan birga, bosh vazir o‘zining Yangi yil murojaatida Tokio 2023-yilda diplomatiya sohasida yetakchi rolni olishini va’da bergan. U Ukrainadagi janglar, koronavirusning yangi shtammi tarqalishi va sobiq hukumat rahbari Sindzo Abening o‘ldirilishi tufayli o‘tgan yilni “bo‘ronli” deb ta’riflagan. Bundan tashqari Kisida Yaponiya Ikkinchi jahon urushidan beri eng yomon xavfsizlik holatiga duch kelganini ta’kidlagan.
Avvalroq Yaponiya Ukraina prezidenti Vladimir Zelenskiyni G7 sammitida onlayn formatda ishtirok etishga taklif qilmoqchiligi haqida xabar berilgandi. Uchrashuv Xirosimada 19—21-may kunlari bo‘lib o‘tadi.
Izoh (0)