Америкалик токсиколог Дэвид Смит Тбилиси судида кўрсатмалар берди, у ерда Грузия собиқ президенти Михаил Саакашвилининг соғлиғи ёмонлашгани туфайли, унга нисбатан ҳукмни кечиктириш ҳақидаги мурожаат муҳокама қилинмоқда. Бу ҳақда «Грузия-Онлайн» хабар бермоқда.
Мутахассиснинг сўзларига кўра, Саакашвили оғир металлар билан заҳарланган. Унинг айтишича, мияга, хусусан, оқ моддага зарар етиши натижасида кучайиб борувчи деменсия келиб чиққан.
«Менинг фикримча, у турли металлар билан, шу жумладан, симоб, мишяк ва барий билан заҳарланган, улар етарлича жиддий токсик эффектга эга. Оғир металларнинг бундай турлари муайян вақт оралиғидан кейин организмдан чиқиб кетади ва мана шу жараёнда улар турли органларни заҳарлайди. Натижада унинг бош миясига зарар етган», — деди Смит.
Шифокор қайд этишича, собиқ президентда периферик невропатия (бош миядан ташқаридаги асабларнинг зарарланишини) ва мушаклар атрофияси кузатилмоқда. Шунингдек, овқат ҳазм қилиш тизими, жигар, юрак ва буйрак каби органларга ҳам зарар етган.
Токисколог огоҳлантиришича, Саакашвилининг қонидаги оғир металлар ногиронликка ва ўлимга сабаб бўлиши ҳам мумкин. Мутахассиснинг сўзларига кўра, собиқ президент Тбилисидаги клиникада муносиб даволанаётгани йўқ. Смит Грузияда ихтисослаштирилган муолажалар олиш мумкин бўлган тиббий муассаса йўқлигини таъкидлади. Шу сабабли Саакашвили олий квалификацияга эга клиникага ўтказилиши керак, бундай муассасалар, масалан, АҚШда бор, деди у.
Грузиянинг собиқ президенти қамоқхонада икки марта очлик эълон қилиш акцияси туфайли соғлиғи ёмонлашгани учун 2022 йил май ойи ўрталаридан буён Тбилисидаги «Вивамед» клиникасида ётибди. Михаил Саакашвили деразалари панжарали палатада ва қуролланган қўриқчилар назоратида сақланмоқда.
Сиёсатчининг онаси Гиули Аласания тиббий ҳисобот натижаларига таяниб, 19 ноябрь куни Саакашвилининг танасида оғир металлар, жумладан симоб, бор ва таллий излари топилганини маълум қилган.
Собиқ президент 2021 йил 1 октябрда Грузияда ҳибсга олинган, унга нисбатан бир қанча жиноий ишлар бўйича тергов ҳаракатлари олиб борилмоқда. Сиёсатчи банкир Сандро Гиргвлиани ўлдирилиши ва депутат Валерий Гелашвилининг калтакланиши ишлари бўйича сиртдан судланган. Биринчи ҳолатда Саакашвили уч йилга, иккинчисида олти йилга озодликдан маҳрум этилган.
Бундан ташқари, у 2007 йил 7 ноябрдаги мухолифат митингини тарқатиб юбориш, «Имеди» телекомпаниясининг погроми ва давлат бюджети маблағларини ўғирлаш ишларида айбланувчи деб топилган ва бу айбловлар ҳали ҳам судда кўриб чиқилмоқда.
Бош вазир Ираклий Гарибошвили, Михаил Саакашвилини узоқ вақт қамоқда қолиши ҳамда бутун жазо муддатини ўташини таъкидлаган.
Мавзуга доир:
Изоҳ (0)