Дунёда катталиги бўйича иккинчи ўринда турувчи Ниагара шаршараси сўнгги 50 йил ичидаги энг кучли қор бўронидан кейин қисман музлаб қолди. Бир неча кундан кейин музга айланган табиий мажмуа устида ёрқин камалак ҳосил бўлди ва кўплаб сайёҳларни ўзига жалб қилди. Бу ҳақда Daily Mail хабар бермоқда.
Шаршарага яқин хиёбон таниб бўлмайдиган даражада ўзгариб кетди: ўриндиқлар, дарахтлар ва шаршара атрофидаги панжараларни музлаб, қалин қор билан қопланди. Шаршаранинг ўзида ҳам катта муз палахсаларини кўриш мумкин эди.
Ниагара тепадан оқиб тушадиган сув ҳажми туфайли тўлиқ музлаб қололмайди, дейилади хабарда. Ҳар сонияда жар тепасидан 3160 тонна сув оқиб тушади.
Қор бўрони АҚШга 23 декабрь куни ёпирилди. Нью-Йорк штатида фавқулодда ҳолат эълон қилинди.
Сўнгги маълумотларга кўра, АҚШда қор бўрони ва совуқ ҳаво оқибатида 78 киши ҳалок бўлди. Ўлим ҳолатлари Колорадо, Канзас, Кентукки, Огайо, Небраска, Миссури, Оклахома, Мичиган, Жанубий Каролина, Теннесси, Висконсин, Иллинойс ва Вермонтда қайд этилди. Нью-Йорк ҳукумати энди ҳаво илиши натижасида штатда сув тошқини юз беришидан хавфсирамоқда.
Бўрон чоғида ҳаво ҳарорати -45 даражагача тушиб кетди. Бир неча киши ўз автомобилларида ўлик ҳолда топилган, баъзилар қор тозалаш вақтида юрак билан боғлиқ муаммолар юз бергани туфайли вафот этган.
Изоҳ (0)