АҚШ Конгрессининг Вакиллар палатаси қонун чиқарувчи орган аъзолари ва ходимларига иш қурилмаларида Хитойнинг TikTok ижтимоий тармоғидан фойдаланишни тақиқлади. Бу ҳақда «Америка овози» нашри хабар берди.
Нашр хабарига кўра, тегишли билдиришнома Вакиллар палатасининг Маъмурий масалалар қўмитаси томонидан юборилган. «Киберхавфсизлик аппарати TikTok мобил дастури бир қатор хавфсизлик таҳдидлари туфайли фойдаланувчилар учун юқори хатарга эга, деган хулосага келди», — дейилади электрон почта хабарида.
Хатда айтилишича, иш қурилмаларига TikTok’ни ўрнатган фойдаланувчи дастурни ўчириб ташлайди ва келажакда ҳам уни юклаб олиш тақиқланади.
Аввалроқ АҚШ Сенати давлат ходимларига федерал ҳукумат электрон қурилмаларида TikTok’дан фойдаланишни тақиқловчи қонун лойиҳасини бир овоздан маъқуллаган эди.
«TikTok — бу Хитой Коммунистик партиясининг троя оти. Бу АҚШ хавфсизлиги учун жиддий таҳдид. Ижтимоий тармоқ Хитой билан алоқаларни бутунлай узмагунча, ҳукумат қурилмаларида унга ўрин йўқ », — деган республикачи сенатор Жош Хоули қонун лойиҳасини Сенатга киритар экан.
16 декабрь куни АҚШ Марказий разведка бошқармаси (МРБ) директори Уильям Бернс Америка разведкаси TikTok АҚШ миллий хавфсизлигига таҳдид солаётганига ишонишини айтди. Унинг фикрича, Хитой расмийлари Америкадаги TikTok фойдаланувчиларининг шахсий маълумотларини олиш, шунингдек, ушбу ижтимоий тармоқда қандай турдаги материаллар жойлаштирилишини назорат қилиш «қобилиятига эга».
TikTok Хитойнинг ByteDance компаниясига тегишли бўлиб, компания Хитой расмийлари билан ҳамкорликда экани ҳақидаги шубҳалар туфайли АҚШда унга нисбатан даъволар мавжуд.
Изоҳ (0)