Украинада февралдан буён 702 та муҳим инфратузилма объектларига зарар етган, дея маълум қилди мамлакат ички ишлар вазири ўринбосари Евгений Енин. У бунда 24 февралдан бери ҳарбий операция олиб бораётган Россияни айблади.
Вазир ўринбосари маълумотларига кўра, Украинада жами 35 мингта объект зарар кўрган. «Гап, хусусан, газ қувурлари, электр қуйи станциялари, кўприклар ва бошқалар ҳақида бормоқда», — деди Енин телемарафон эфирида.
Бундан бир ой аввал, 27 ноябрь куни вазир ўринбосари 32 мингта объект ва 700 дан ортиқ муҳим инфратузилма объектлари зарар кўрганини айтганди.
Украина 27 декабрь куни 2023 йил февраль охирига қадар БМТ доирасида «тинчлик саммити»ни ўтказиш ташаббуси билан чиқди. Воситачи сифатида Киев БМТ бош котиби Антониу Гутерришни кўришни хоҳлайди. Украина ташқи ишлар вазири Дмитрий Кулеба Россия «ҳарбий жиноятлари учун жавобгарликка тортилганидан кейингина» учрашувга таклиф қилиниши мумкинлигини айтди.
Октябрь ойи бошидан бери Россия Мудофаа вазирлиги Украинанинг ҳарбий ва энергетика инфратузилмасига мунтазам ракета зарбалари бериб келмоқда. Ҳужумларда Россия Эрондан сотиб олган дронлардан ҳам фойдаланмоқда.
Россия ҳарбийлари 27 декабрь куни Херсондаги касалхонанинг туғруқ бўлимини ўққа тутди, 24 декабрь куни эса улар Херсонда, жумладан, иккита тиббиёт муассасасига зарба берганди.
Изоҳ (0)