Кадис кўрфазида Испания полицияси божхона органлари ва жиноятга қарши кураш агентлиги ходимлари билан биргаликда бортида 4 тоннадан ортиқ гашиш бўлган Британия елканли кемасини қўлга олди. Бу ҳақда Испания Миллий полиция сайтида хабар берилди.
Идора маълумотларига кўра, кема Марокашнинг ғарбий қирғоқлари томон йўл олган, бироқ Гибралтар бўғозидаги ноқулай об-ҳаво шароити туфайли Испания сувларига қайтишга мажбур бўлган.
Испаниядаги ҳуқуқ-тартибот идоралари Британия расмийлари томонидан шубҳали елканли кема ҳақида аввалроқ огоҳлантирилган эди. Текширув давомида аниқланишича, наркотик моддалар кейинчалик Жанубий Америкага жўнатиш учун Марокашга етказилиши керак бўлган.
Елканли кема Кадис шаҳридаги яхталар турадиган жойда топилганидан кейин кузатиб борилган. Кема бўрондан паноҳ топиш учун Испания сувларига қайтганида, унга божхона патруль кемаси яқинлашган. Божхоначилар кема бортида кўп сонли қопларни топгач кема Кадис портига олиб кетилган. У ерда тинтув чоғида 130 дона ўрам топилган, улар ичида 4,4 тоннага яқин гашиш смоласи бор эди.
Икки экипаж аъзоси ҳибсга олинди, бироқ тергов ҳали ҳам давом этмоқда, яна ҳибсга олишлар бўлиши мумкин, деб маълум қилди полиция.
Изоҳ (0)