Хитой 8 январдан мамлакатга кириб келувчилар учун карантинни бекор қилади. Бу ҳақда Reuters ХХР Соғлиқни сақлаш миллий комиссиясига таяниб хабар бермоқда.
Хитойга кириб келувчиларнинг кўпчилиги учун карантин коронавирус пандемияси бошидан буён сақланиб келмоқда. Уни 2022 йил кузидагина юмшата бошлашди ва карантин муддатини ўн кундан саккиз кунгача қисқартиришди.
Хитойга киришда карантин тўлиқ бекор қилинганидан кейин ҳам аввалгидек, сўнгги 48 соат ичида олинган коронавирус тести натижасини тақдим этиш керак бўлади.
Хитой қарийб уч йил мобайнида коронавирусга нисбатан «нол бардошлилик» сиёсатига амал қилиб, аҳоли учун қатъий чеклов чораларини, шу жумладан, оммавий локдаунларни сақлаб келди. 2022 йил ноябрида бу катта кўламли норозилик акцияларини келтириб чиқарди, шундан кейин Хитой ҳукумати коронавирусга қарши чораларни бекор қила бошлади.
Чекловларнинг юмшатилиши, афтидан, касалланиш ҳолатлари кескин кўпайишига олиб келди. 20 декабрь кунининг ўзида 37 миллион киши, декабрь бошидан буён эса — 250 миллион киши коронавирусга чалинди, деб ёзган эди Bloomberg 23 декабрь куни Соғлиқни сақлаш миллий комиссияси ёпиқ мажлисида айтилган маълумотларга таяниб.
25 декабрдан бошлаб комиссия коронавирус бўйича кунлик маълумотларни эълон қилишни тўхтатди. Улар 2020 йил январидан буён ҳар куни эълон қилиниб келарди, у ердаги рақамлар жуда кичрайтирилган деб ҳисобланиларди. Масалан, 20 декабрь куни маълумотномада коронавирусга чалиниш билан боғлиқ бор-йўғи уч мингта янги ҳолат ҳақида айтилганди (Bloomberg версиясига кўра — 37 миллионта ҳолат).
Хитойда коронавируснинг жорий тўлқини январь ойида ўз чўққисига чиқиши кутилмоқда, деб ёзади Bloomberg.
Изоҳ (0)