Сербия қуролли кучлари президент Александр Вучич фармони билан жанговар шайлик ҳолатига келтирилди. Бу ҳақда мудофаа вазири Милош Вучевич Tanjug нашрига маълум қилди.
«Бу бизни Сербия армияси мамлакат ҳудудий яхлитлиги ва суверенитетини, барча фуқароларни ҳимоя қилиш ва, қаерда яшашидан қатъи назар, сербларга нисбатан террор олдини олиш учун олиб борадиган ҳаракатларгача бўлган энг юқори даражага чиқаради», — деди у.
Мамлакат ички ишлар вазири Братислав Гашич ўз навбатида маълум қилишича, ИИВ бўлинмалари Бош штаб бошлиғи қўмондонлиги остига берилади ва «тезкор режада кўзда тутилган позицияларни эгаллайди».
Сербия ташқи ишлар вазири Ивица Дачичнинг айтишича, Косово шимолида ва қисман тан олинган Косово Республикасининг назорати остидаги Метохия мухтор ўлкасида яшайдиган сербларга ҳужум бўлган тақдирда, Белград аралашишга тайёр.
Сербиянинг «Вечерне Новости» портали манбаларига таяниб ёзишича, Косово кучлари ҳам жанговар шайлик ҳолатига келтирилган.
Косоводаги вазият ҳукуматнинг республика ҳудудида фақат маҳаллий авторақамлар билан юриш ҳақидаги талаблари туфайли кескинлашишни бошлади. Ноябрда маҳаллий ҳукумат серб рақамларидан фойдаланганлик учун жарима солишга ваъда берди. Асосан серблар истиқомат қиладиган Косово шимолида баррикадалар пайдо бўлди, маҳаллий аҳоли эса чегара пунктларига олиб борадиган йўлларни тўсиб қўя бошлади.
Декабрь ўрталарида Косово ҳукумати баррикадаларни олиб ташлашни талаб қилди, бош вазир Альбин Курти Косово хавфсизлик кучлари тўсиқларни ўзлари демонтаж қилиши мумкинлигини истисно қилмади.
26 декабрга ўтар кечаси Сербия ва Косово чегарасидаги Зубин-Поток шаҳри ҳудудида НАТО кучлари патрули яқинида отишма юз берди, ҳеч ким жабрланмади. Сербия бош штаби бошлиғи Милан Мойсилович чегара яқинидаги Рашку шаҳрига жўнаб кетди. У вазиятни мураккаб деб атаб, Косово билан чегарага серб ҳарбийларини жойлаштиришга эҳтиёж борлигини айтди.
Изоҳ (0)