Пентагоннинг баъзи расмий шахслари Кремлга «бошини танидан жудо қиладиган зарба» («раҳбарсиз қолдирадиган зарба») бериш билан таҳдид қилган, бу эса Россия президентини жисмоний жиҳатдан бартараф қилишни англатиши мумкин. Бу ҳақда Россия ташқи ишлар вазири Сергей Лавров маълум қилди. Унинг сўзларига кўра, Ғарбнинг Россияни тийиб туришга қаратилган сиёсати ўта хавфли ва ядро давлатлари ўртасида тўғридан-тўғри қуролли тўқнашув хавфини келтириб чиқаради.
«Вашингтондагилар ҳаммадан ҳам узоққа борди: у ерда Пентагоннинг қандайдир ‘ўз исмини ошкор қилмаган расмий шахслари’ Кремлга ‘бошини танидан жудо қилувчи зарба’ бериш билан таҳдид қилди, деса ҳам бўлади, аслида гап Россия давлати раҳбарини жисмонан бартараф этиш ҳақида бормоқда. Агар бундай ғоялар ҳақиқатан ҳам кимлардир томонидан пишитилаётган бўлса, улар бунақа режаларнинг эҳтимолий оқибатлари ҳақида яхшилаб ўйлаб кўриши керак», — деди Лавров «ТАСС»га берган интервьюсида.
Шунингдек, у Украина президенти Владимир Зеленский «НАТО мамлакатларининг Россияга превентив ядро зарбалари ҳақида келишиб олгани»ни айтди. Вазир қайд этишича, ядро урушида ғолиблар бўлмайди, «ва у ҳеч қачон бошланмаслиги керак».
«АҚШда ва умуман, Ғарбда ядро қуроли мавзуси атрофида пропагандачилик вакханалияси борлигини чуқур ташвиш билан қайд этамиз», — деди Сергей Лавров.
Россия ташқи ишлар вазири фикрича, Украина АҚШ ва НАТОнинг бошқа аъзоларини қуролли низога тортишга уриниб, уларнинг Россия билан «юзма-юз тўқнаш келиши»га умид қилмоқда. Унинг айтишича, Киев ўз назорати остидаги ҳудудларни демилитаризация ва денацификация қилиш бўйича талабларни яхшиликча бажариши керак, акс ҳолда бу масалани Россия армияси ҳал қилади.
Изоҳ (0)