Xitoyning Guanchjou shahridagi kamida yetti tuman ma’muriyati norozilik namoyishlari tufayli koronavirus cheklovlarini yengillashtirdi. Bu haqda Deutsche Welle xabar berdi.
Chunsin va Xaychju shaharlarida ham kovid cheklovlari olib tashlandi. Mamlakat rasmiylari koronavirusga chalingan ba’zi odamlarga uyda karantinni o‘tashga ruxsat bermoqchi.
Ta’kidlanishicha, ommaviy PZR testi topshirish bekor qilingan. Endi bu test faqat bemor bilan aloqada bo‘lganlar uchun o‘tkaziladi. Mamlakatning koronavirusga qarshi kurashini nazorat qiluvchi Xitoy bosh vaziri o‘rinbosari Sun Chunlan virusning kasallik keltirib chiqarish qobiliyati pasayayotganini aytdi.
“Mamlakat yangi epidemiyaning oldini olish va nazorat qilish muammolariga duch kelmoqda, chunki omikron virusining patogenligi pasaymoqda. Ko‘proq odamlar emlanmoqda va virusni ‘ushlab turish’da tajriba orttirmoqda”, — deydi u.
18 milliondan ortiq aholi istiqomat qiladigan Guanchjouda bir necha hafta davomida qattiq karantin joriy etilgandi, korxona va fabrikalar ishi to‘xtatilgan, kasallar va ular bilan aloqada bo‘lganlar uchun qat’iy karantin choralari qo‘llanilgan.
Xitoyda koronavirus cheklovlariga qarshi norozilik harakatlari Shanxay, Chendu, Chunsin, Uxan va Nankin kabi boshqa megapolislarida ham bo‘lib o‘tgan. Odamlar “Karantinni bekor qiling”, “Si Szinpin iste’foga chiqsin, Kommunistik partiya iste’foga chiqsin”, “Shinjonni oching, Xitoyni oching”, “Bizga PZR testlar kerak emas, bizga erkinlik kerak” degan shiorlar va talablar bilan chiqqan. Ularning ko‘pchiligi mamlakatdagi senzuraga qarshilik belgisi sifatida qo‘llarida oq qog‘ozlar ko‘tarib olgan.
Izoh (0)