Туркия президенти Ражаб Тоййиб Эрдўғон Анқара Қора денгизда янги газ конини топганини маълум қилди. Энди, президентнинг сўзларига кўра, Туркия гази захиралари 710 миллиард кубометрни ташкил қилади.
Туркия етакчиси маълумотларига кўра, топилган газ қиймати 1 триллион долларга тенг. Анқара Ўртаер денгизи, Каспий ва Яқин Шарқнинг энергетика марказига айланмоқчи, деди Эрдўғон.
«Бизнинг Фатиҳ бурғиловчи кемамиз ‘Чайжума-1’ қудуғини бурғилаш чоғида сув остида 3023 метр чуқурликда 58 миллиард кубометрга тенг табиий газ захираларини аниқлади», — деди давлат раҳбари.
«Бизнинг якуний мақсадимиз — иложи борича тезроқ нефть ва табиий газга нисбатан ташқи боғлиқлигимизга барҳам бериш. Биз Туркияни Ўртаер денгизи, Каспий ва Яқин Шарқнинг энергетика марказига айлантиришга қатъий бел боғладик. Биз Шарқ ва Ғарбни нафақат Истанбул ва Дарданеллдаги кўприкларимиз билан, балки энергетика кўприкларимиз билан ҳам бирлаштирамиз», — деди Эрдўғон.
Декабрь ўрталарида Туркия президенти 12 миллиард долларлик 150 миллион баррель нефть бўлган кон аниқланганини маълум қилганди. Июлда ҳам Анқара мамлакат жанубида Чукурова нефть конини кашф қилганди. Туркия Энергетика вазирлиги маълумотларига кўра, у ерда топилган нефть миқдори — 7,5—8 миллион баррелга тенг.
Изоҳ (0)