Россия Хавфсизлик кенгаши раиси ўринбосари ва президентнинг Ҳарбий-саноат комиссиясидаги ўринбосари Дмитрий Медведев келаси йил нималар содир бўлиши юзасидан ўзининг «футуристик фаразлари» билан бўлишди. Хусусан, у 2023 йилда Евроиттифоқ парчаланиб кетишини ва АҚШда фуқаролар уруши бошланишини истисно қилмаяпти. Прогнозни у ўз Telegram-каналида эълон қилди.
«Кўпчилик футуристик фаразлар бўйича машқ қилиб, энг кутилмаган ва ҳатто мантиқсиз тахминларни келтирмоқда. Биз ҳам қўлдан келганча ўз ҳиссамизни қўшамиз», — деб ёзди Медведев.
Сиёсатчининг 2023 йил бўйича прогнозлари орасида қуйидагилар бор:
- нефть нархи бир баррель учун 150 долларгача, газ нархи эса 1 минг кубометр учун 5000 долларгача ўсиши, асосий фонд майдонларининг АҚШ ва Европадан Осиёга кўчиши;
- Буюк Британия қайтганидан кейин, Европа иттифоқининг парчаланиши ва евронинг собиқ ЕИ валютаси сифатида айланишининг бекор қилиниши;
- Германия ва унга қўшилган малайлар, шу жумладан, «Киев республикаси», Польша ва Болтиқбўйи мамлакатлари базасида «Тўртинчи рейх» тузилиши;
- Франция ва «Тўртинчи рейх» ўртасидаги уруш, Европанинг бўлиниши;
- АҚШда фуқаролар уруши, Калифорния ва Техаснинг мустақил давлатларга ажралиши, АҚШ президентлигига сайловларда Илон Маскнинг ғалабаси.
Эслатиб ўтамиз, Медведев «Российская газета»да «Бизнинг халқимиз, еримиз, ҳақиқатимиз» номли мақоласини чоп эттирди ва унда 6 банд билан 2022 йил якунларини сарҳисоб қилди. У Украинанинг амалдаги расмийлари билан тинчлик музокараларини рад этди ва давом этаётган ядровий таҳдид ҳақида гапирди. Аммо у «охирзамон ҳали келмайди», деб ишонтирди.
Изоҳ (0)