Xitoy Xalq Respublikasi raisi Si Szinpin Yevrokengash rahbari Sharl Mishelga mamlakatda koronavirus cheklovlariga qarshi norozilik namoyishlari ortida “hafsalasi pir bo‘lgan talabalar” turganini aytdi. Bu haqda South China Morning Post yevropalik rasmiy shaxslarga tayanib xabar berdi.
Yevroittifoqning yuqori mansabli amaldorlari aytishicha, Si Pekindagi uch soatlik uchrashuv chog‘ida shunday izoh bergan. Bu Xitoy yetakchisining mamlakat bo‘ylab avj olgan mitinglarga birinchi marta munosabat bildirishidir.
Shuningdek, Si keksalarning vaksinatsiya qilinishi yuzasidan xavotir bildirgan, ammo koronavirus omikron shtammining o‘lim darajasi pastligini e’tirof etgan. Yevropalik mansabdorlar fikricha, bu XXR rahbarining cheklovlarni kamaytirishga tayyorligidan darak berishi mumkin.
Avvalroq Xitoy Davlat kengashi bosh vaziri o‘rinbosari, koronavirus tarqalishi ustidan nazorat bo‘yicha mas’ul bo‘lgan Sun Chunlan noroziliklar fonida koronavirusga qarshi choralar muntazam optimallashtirilishi zarurligini aytgandi.
29-noyabr kuni Pekin va Guanchjou ma’murlari COVID-19 ga qarshi choralarning ba’zilarini susaytirgan edi.
Xitoy hukumati koronavirusga nisbatan “nol bardoshlilik” siyosatini olib bormoqda: shaharlarda butun boshli dahalar yopib tashlanmoqda, kasallanganlar bilan aloqada bo‘lgan odamlar majburan karantinga yuborilmoqda, bemorlar kasalxonalarda izolyatsiya qilinmoqda, mamlakat chegaralari esa aslida yopiq bo‘lib qolmoqda.
Noroziliklar Shinjon-Uyg‘ur muxtor tumanining Urumchi shahridagi turar-joylardan birida yong‘in chiqqanidan keyin boshlangandi. 24-noyabr kuni yuz bergan hodisada kamida o‘n kishi halok bo‘lib, yana to‘qqiz kishi jarohatlangandi.
Guvohlar qayd etishicha, lokdaun tufayli kvartiralar eshiklari yopib tashlangani uchun, odamlar tashqariga chiqa olmagan, cheklov choralari sababli esa qutqaruv xizmatlari vaqtida yetib kela olmagan. Xitoy hukumati buni rad etmoqda.
Norozilik harakatlari Xitoyning Shanxay, Chendu, Chunsin, Uxan va Nankin kabi boshqa megapolislarida ham bo‘lib o‘tdi. Universitetlarda ham noroziliklar kuchaygan.
Keyinroq namoyishchilar Si Szinpinning iste’fosini talab eta boshladi. Odamlar “Karantinni bekor qiling”, “Si Szinpin iste’foga chiqsin, Kommunistik partiya iste’foga chiqsin”, “Shinjonni oching, Xitoyni oching”, “Bizga PZR-testlar kerak emas, bizga erkinlik kerak” degan shiorlar va talablar bilan chiqqan.
Izoh (0)