АҚШ Давлат департаменти Украина учун 1,85 миллиард долларлик янги ёрдам пакети ҳақида эълон қилди, унинг доирасида Киев Patriot зенит-ракета мажмуасини қўлга киритади.
«Бу ёрдам биринчи марта Patriot зенит-ракета мажмуасини ўз ичига олади, у қанотли ракеталар, кичик масофали баллистик ракеталар ва самолётларни аввал етказиб берилган ҳаво ҳужумига қарши мудофаа тизимларига нисбатан каттароқ баландликда уриб туширишга қодир», — дейилади АҚШ Давлат департаменти раҳбари Энтони Блинкеннинг баёнотида.
Унинг сўзларига кўра, Украина, шунингдек, юқори аниқликдаги зарбаларни бериш учун воситаларга, «қўшимча аслаҳа-анжом ва энг муҳим ускуналарни» қўлга киритади. Бундай қурол-яроғлар етказиб берилиши ҳақида аввалроқ Украина президенти Владимир Зеленскийнинг Вашингтонга расмий ташрифи ҳақидаги хабарлар фонида ОАВлар эълон қилган эди.
Таъкидланишича, АҚШ президенти Жо Байден бир миллиард долларгача ҳажмда навбатдаги ҳарбий ёрдам пакетини ажратиш ҳақида меморандум имзолаган. Яна 850 миллион долларлик ёрдамни эса Пентагон ажратади.
Шу тариқа, АҚШ президентининг жорий администрацияси томонидан Украинага йўналтирилган ҳарбий кўмак ҳажми 21,9 миллиард долларга етади.
Владимир Зеленский 21 декабрь куни эълон қилинмаган ташриф билан Вашингтонга келди. Ташриф доирасида Америка етакчиси билан музокаралар ўтказди, шунингдек, АҚШ Конгрессида нутқ сўзлади.
Изоҳ (0)