АҚШ наркокартелларга қарши кураш доирасида Кариб денгизи жанубига ҳаво ва денгиз кучларини юборди. Бу ҳақда учта манбага таяниб, Reuters хабар берди.
Миссияга 4 мингдан ортиқ денгиз пиёдалари, флот хизматчилари, ядро сувости кемаси, бир нечта эсминецлар, ракета крейсери, шунингдек, қўшимча P8 Poseidon разведка самолётлари жалб қилинади. Ҳарбийлар ва техника “Иводзима” (USS Iwо Jimа) амфибия гуруҳининг десант кемалари ташийди. Миссияда денгиз пиёдаларининг 22-экспедиция гуруҳи иштирок этмоқда. Улар АҚШ Жанубий қўмондонлиги (SouthCom) масъул ҳудудда жойлашиши кутилмоқда.
Манбалардан бирининг айтишича, мазкур операция намойишкорона хусусиятга эга. У АҚШнинг наркотеррор ташкилотларга қарши қатъий ҳаракатларга тайёрлигини кўрсатишга қаратилган.
Яна бир амалдор эса қўшимча кучлар картеллардан келиб чиқаётган миллий хавфсизлик таҳдидларини бартараф этишга йўналтирилганини айтди. Зарурат туғилганда АҚШ президенти Дональд Трамп ушбу ресурслардан тўғридан тўғри ҳарбий чоралар учун фойдаланиши мумкин. Мавжуд зарба берувчи воситаларнинг кўплиги унга ва қўмондонликка турли сценарийларни танлаш имконини беради.
Шу билан бирга, Пентагон денгиз пиёдалари наркотик моддалар савдосига чек қўйиш бўйича операцияларни ўтказишга ўргатилмаганидан ташвишда. Бу эса уларнинг кўп жиҳатдан қирғоқ қўриқчиларига таянишига олиб келади.
АҚШ ҳарбий-денгиз кучлари 15 август куни USS Iwo Jima, USS Fort Lauderdale va USS San Antonio десант кемаларидан иборат амфибия гуруҳини жўнатганини эълон қилди, бироқ манзилни аниқ кўрсатмади. Йил бошида мудофаа вазири Пит Ҳегсет имзолаган меморандумда АҚШ қуролли кучларининг устувор вазифаси мамлакатни ҳимоя қилиш экани, бунга ноқонуний миграция ва наркотрафикка қарши кураш ҳам кириши алоҳида таъкидланган.
Март ойида эса АҚШ ҳарбийлари Мексика яқинига эсминецларни жойлаштирган, бу эса Шимолий қўмондонлик миссиясини қўллаб-қувватлаш, яъни чегаралар хавфсизлигини таъминлаш ва АҚШнинг Ғарбий яримшардаги иштирокини кучайтириш мақсадида амалга оширилган эди.
Изоҳ (0)