Россиянинг Свердловск вилоятида депутат Вячеслав Вегнер аёл маҳбусларни Украинадаги урушга юборишни таклиф қилди.
Депутатнинг сўзларига кўра, колониялардан бирида сақланаётган россиялик аёллар унга шундай мурожаат қилган.
«Свердловск вилоятидаги ИК-6-да жазо муддатини ўтаётган аёллар гуруҳи менга мурожаат қилди. Улар махсус ҳарбий операция зонасига сигналчи, шифокор ва ҳамшира сифатида боришга, ҳарбийларимизга ёрдам беришга тайёрлигини билдирди», — дейди депутат.
Унинг сўзларига кўра, урушда «фақат аёлларнинг қўлидан келадиган иш кўп, эркакларга ўн марта тушунтириш»дан кўра, аёлларга яраларни бирламчи даволаш усулини ўргатиш осонроқ.
«Бунга ярадорларни жанг майдонидан олиб чиқиш, яраларни бирламчи даволаш, боғлаш киради. Украинадаги урушда ярадорлар борлигини тушунамиз, уларнинг сони сезиларли даражада ошган», — дея тушунтирди Вегнер.
Қайд этилишича, «Вагнер» хусусий ҳарбий компанияси раҳбари Евгений Пригожин депутатнинг таклифини қўллаб-қувватлаган.
«Мен сизнинг фикрингизга мутлақо қўшиламан. Улар нафақат ҳамшира ва сигналчиликка, балки снайпер ҳам бўлиши мумкин. Биз бу йўналишда ишлаяпмиз. Қаршилик бор, лекин буни сиқиб чиқарамиз, деб ўйлайман», — дейди у.
«Вагнер» қандай гуруҳ?
Кўплаб Ғарб ОАВлари Вагнер гуруҳи тўғридан-тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.«Konkord» компанияси эгаси бўлган Евгений Пригожин 2016 йилдан буён АҚШ, 2020 йилдан буён эса Евроиттифоқ санкциялари остидадир. Вашингтонда у Интернет тадқиқотлари агентлиги (троллар фабрикаси) ва «Вагнер»ни назорат қилишда айбланган.
У «Вагнер»га алоқадорлигини кўп марта рад этган ва бундай айбловлар сабабли судлашган, аммо 2022 йил сентябрида у «Вагнер» асосчиси эканини маълум қилди. Ташкилотни 2014 йилда, унинг сўзларига кўра, «Донбассда рус халқига нисбатан геноцид» бошланган вақтда тузган.
Изоҳ (0)