АҚШ давлат котиби Марко Рубио 17 август куни Россиянинг амалдаги тинчлик музокараларидан ижобий натижа чиқмаса, унга нисбатан қўшимча чоралар қўлланишини маълум қилди. Бу ҳақда маҳаллий нашрларга таяниб, Anadolu хабар берди.
“Тинчлик музокаралари ижобий натижасиз тугаса, Россияни яна қўшимча оқибатлар кутади. Биз эса буни олдини олиш учун тинчлик келишуви устида ишлаяпмиз”, деди Марко Рубио.
Рубиога кўра, дипломатия ва босим ўртасида нозик мувозанат мавжуд. Агар янги ва кескин санкциялар жорий этилса, музокаралар дарҳол тўхтаб қолади. Шундай қилиб, уруш яна давом этаверади.
Давлат котиби ҳақиқий тинчлик фақат муроса орқали эришилишини таъкидламоқда:
“Икки томон ҳам нимадандир воз кечмаса, ўртада сулҳ тузишнинг имкони бўлмайди. Бундай ҳолат тинчлик келишуви эмас, таслим бўлиш деб аталади”.
Рубио, шунингдек, Трамп ва Путин ўртасида ўтган учрашувда айрим масалаларда келишув имкониятлари кўрилгани, аммо катта қарама-қаршиликлар ҳамон сақланиб қолаётганини билдирган. Унинг айтишича, асосий масалалар ҳудудий чегаралар, узоқ муддатли хавфсизлик кафолатлари ва Украинага ҳарбий иттифоқ тузиш ҳуқуқи билан боғлиқ.
“Тинчлик келишуви Украина иштирокида бўлиши мумкин. Бу уларнинг мамлакати, ҳудуди”, деди Рубио.
Рубионинг қўшимча қилишича, Аляскада ўтган учрашувдан якуний келишув кутилмаган, чунки унда украиналиклар иштирок этмаган.
Маълумот учун, АҚШ президенти Дональд Трамп ва Россия президенти Владимир Путин 15 август куни Аляскада 3 соатлик ёпиқ эшиклар ортида учрашув ўтказганди. Путин музокаралар натижасида “муайян тушунча” шаклланганини билдирган. Трамп эса асосий масалалар бўйича келишувга эришилганини, фақат айрим кичик мавзулар очиқ қолганини айтган. Айни пайтда, Украина президенти Владимир Зеленский 18 август куни Вашингтонда Трамп билан шахсан учрашиб, музокара таклифларини муҳокама қилиши кутилмоқда.
Изоҳ (0)