ФИФА Зеленскийнинг футбол бўйича ЖЧ финали олдидан «тинчлик ҳақидаги мурожаат» билан чиқишига рухсат бермади

Халқаро футбол федерацияси (ФИФА) Украина президенти Владимир Зеленскийга Қатарда бўлиб ўтаётган футбол бўйича жаҳон чемпионати финали олдидан «бутун дунёда тинчлик ҳақидаги мурожаат» билан чиқиш имкониятини тақдим этишдан бош тортди. Бу ҳақда CNN ўз манбасига таяниб хабар бермоқда.

Унинг сўзларига кўра, бундай ташаббус билан Украина президенти офиси чиққан. У ерда ЖЧ финал ўйини олдидан стадионда Зеленскийнинг видеомурожаатини кўрсатишни сўрашган ва рад жавобидан ҳайратга тушишган. «ФИФА ўз платформасидан эзгу мақсадларда фойдаланишни хоҳлайди, деб ўйлардик», — деди манба ва футбол федерациясида музокаралар ҳали давом этаётганини таъкидлади.

ФИФА CNN хабарини изоҳлаганича йўқ.

Қатарда ЖЧ финали 18 декабрь куни бўлиб ўтади, унда Аргентина ва Франция баҳс олиб боради.

Владимир Зеленскийнинг офиси Украинадаги урушга қўшимча эътиборни жалб этиш учун йирик халқаро тадбирлардан фойдаланишга интилиб келади.

Аввалроқ Зеленский Канн фестивалида ва «Гремми» мусиқий мукофотларини топшириш маросимида нутқ билан чиққан. Украина етакчисининг офиси унинг «Оскар»да ҳам чиқиш қилишини ташкиллаштирмоқчи бўлган, бироқ бу амалга ошмаган.