Европа Иттифоқи Кенгаши Украинадаги уруш туфайли Россияга қарши тўққизинчи иқтисодий ва индивидуал санкциялар пакетини тасдиқлади. Бу ҳақда ЕИ кенгаши сайтида хабар берилди.
Тўққизинчи санкциялар тўпламига қуйидагилар киради:
- ҳарбий-саноат комплекси билан боғлиқ 168 та рус компаниясига чеклов киритиш;
- авиация учун двигателларни, шу жумладан дронларни Россияга экспорт қилишни тақиқлаш;
- «Первий канал», «НТВ»/«НТВ-Мир», «Россия-1» ва «РЕН ТВ» телеканалларининг эшиттириш лицензиясини бекор қилиш;
- энергетика ва тоғ-кон саноатига қарши санкциялар;
- икки рус банкининг маблағларини музлатиш;
- Бутунроссия банкининг транзакцияларини блокировка қилиш;
- Европа Иттифоқи фуқароларининг Россиядаги давлатга тегишли ёки давлат томонидан назорат қилинадиган ҳар қандай компаниялар, ташкилотлар ёки органларнинг бошқарув аъзолари бўлишини тақиқлаш;
- индивидуал санкциялар (баёнотда кўрсатилмаган).
Аввалроқ Reuters’нинг дипломатик манбалари Евроиттифоқ мамлакатлари санкцияларнинг тўққизинчи пакети бўйича келишувга эриша олмаганини айтганди. Агентлик маълумотларига кўра, музокаралар иштирокчилари келишувга яқинлашган, бироқ улар баъзи мамлакатлар, масалан, Польшанинг норозиликларига ечим топа олмаган.
Изоҳ (0)