Тожикистоннинг таклифи билан 2025 йил Халқаро музликларни сақлаш йили деб эълон қилинади. Бу ҳақдаги резолюция Бирлашган Миллатлар Ташкилоти (БМТ) Бош ассамблеясининг 77-сессиясида қабул қилинди, дея хабар бермоқда Тожикистон Ташқи ишлар вазирлиги матбуот хизмати.
«Тинчлик ва миллий бирлик асосчиси – миллат етакчиси, Тожикистон Республикаси президенти Имомали Раҳмоннинг навбатдаги ташаббуси БМТга аъзо 153 та давлат кўмагида қабул қилинди», — дейилади ТИВ хабарида.
Тожикистон томонидан берилган қуйидаги таклифлар ҳам қўллаб-қувватланди:
- 21 мартни Бутунжаҳон музликлар куни деб эълон қилиш;
- музликларни сақлашга кўмаклашиш учун БМТнинг Trast фондини яратиш;
- 2025 йилда Душанбеда шу мавзуда халқаро конференция ўтказиш.
Имомали Раҳмон 2021 йил сентябрь ойида БМТ Бош ассамблеясининг 76-сессияси иштирокчиларига йўллаган видеомурожаатида музликларнинг эриши муаммосига тўхталганди. У Тожикистон тоғларида иқлим ўзгариши ва глобал исиш туфайли 13 минг музликнинг мингдан ортиғи бутунлай эриб кетганини айтган. Биргина Федченко музлиги сўнгги ўн йилликларда 11 квадрат километрга қисқарган.
«Айни пайтда Марказий Осиёдаги сув ресурсларининг 60 фоизга яқини Тожикистон музликларидан олинади», — деган эди Раҳмон.
ЮНЕСКОнинг янги ҳисоботида айтилишича, Ғарбий Тян-Шан – Қозоғистон, Қирғизистон ва Ўзбекистондаги музликлар сўнгги 20 йил ичида 27 фоизга қисқарган. 2050 йилга келиб, 50 та Жаҳон мероси объектларининг учдан бирида музликлар йўқ бўлиб кетиши прогноз қилинмоқда. Айни пайтда улар ҳар йили 58 миллиард тонна музни йўқотмоқда, бу Франция ва Испаниянинг умумий йиллик сув истеъмолига тенг. Уларнинг эриши глобал денгиз сатҳининг деярли 5 фоиз кўтарилишига сабаб бўлади.
ЮНЕСКО рўйхатига киритилган энг тез эриётган музлик Хитойнинг Юньнань провинциясидаги «Уч параллел дарё» миллий боғида жойлашган. XXI аср ўрталарига келиб у йўқ бўлиб кетади.
Изоҳ (0)