14 ноябрь куни Саида Мирзиёева Президент администрациясининг Коммуникациялар ва ахборот сиёсати бўйича шўъба мудири лавозимига тайинланди.
Президент фармойиши билан Саида Мирзиёева Президент администрацияси Ижро этувчи аппаратининг Коммуникациялар ва ахборот сиёсати бўйича шўъба мудири лавозимига тайинланди. Шунингдек, у ижтимоий соҳа, маданият ва таълим соҳаларидаги ислоҳотлар ижросининг боришини ҳам назорат қилади.
Таъкидланишича, ушбу шўъба янгидан тузилган бўлиб, Президент администрацияси раҳбарининг жамоатчилик фикрини ўрганиш ва ахборот сиёсати учун масъул ўринбосари тизими таркибига киради.
Жаҳон иқтисодиёти ва дипломатия университети битирувчиси, Тошкент давлат юридик университети, Ломоносов номидаги Москва давлат университети магистри, иқтисодиёт фанлари номзоди Саида Мирзиёева йиллар давомида турли соҳаларда, 2019−2020 йилларда Президент администрацияси ҳузуридаги Ахборот ва оммавий коммуникациялар агентлиги директорининг ўринбосари, 2020 йилдан бугунги тайинловга қадар Миллий масс-медиани қўллаб-қувватлаш ва ривожлантириш фонди Васийлик кенгаши раисининг ўринбосари лавозимларида фаолият юритган.
Саида Мирзиёева фаолияти давомида Ўзбекистонда оммавий ахборот воситаларини ривожлантириш, сўз эркинлигини таъминлашга қаратилган ислоҳотларни ҳаётга жорий этиш бўйича кўплаб самарали лойиҳаларни амалга оширди. Шу билан бирга, мамлакатдаги кўплаб ижтимоий лойиҳалар ташаббускори бўлди.
Жумладан, кўзи ожиз болаларни қўллаб-қувватлаш ҳамда уларни Брайл ёзувида чоп этилган ўқув, бадиий, илмий ва бошқа зарур адабиётлар билан таъминлашга қаратилган «Кўнгил кўзи» лойиҳаси фаолиятини кенгайтиришда фаол иш олиб борди.
2020 йили Дубайда бўлиб ўтган Халқаро аёллар форумида Саида Мирзиёева ўзининг нутқи билан қатнашиб, аёллар ҳуқуқлари бўйича бир қатор муҳим фикрларни илгари сурди.
Шунингдек, мамлакатнинг халқаро имижини кўтариш ва Ўзбекистон санъатини жаҳон миқёсида кенг тарғиб қилиш бўйича Маданият ва санъатни ривожлантириш жамғармаси билан ҳамкорликда тарихда илк бор Париж жавоҳири, дунё маданияти ва санъатининг энг нодир намуналарини ўзида жамлаган Лувр музейида Ўзбекистон маданий меросларига бағишланган кўргазма ташкил этиш каби йирик лойиҳаларни амалга оширишда фаол қатнашиб келмоқда.
Бундан ташқари, гендер тенглик масалалари, Ўзбекистон ва Марказий Осиё минтақасида аёлларнинг ҳуқуқ ва имкониятларини мустаҳкамлашга доир кенг кўламли кўплаб лойиҳаларни амалга оширди.
Ўтган 2021 йилда «Заковат» лойиҳасини янги поғонага кўтариш мақсадида «Заковат» интеллектуал клуби ва унинг турнирларини ташкил этишда фаол қатнашди. Бунинг ортидан юртимиздаги билимга чанқоқ минглаб ёшлар «Заковат» ўйинлари атрофида бирлашди.
2021 йилда Саида Мирзиёева бошчилигидаги Маданият ва санъатни ривожлантириш жамғармаси томонидан Жаҳон мероси рўйхатига киритилган лазги рақси балет кўринишида саҳналаштирилди.
Эндиликда Саида Мирзиёеванинг Президент администрациясидаги Коммуникациялар ва ахборот сиёсати бўйича шўъба мудири лавозимга тайинланиши катта аҳамият касб этади. Чунки у ҳукумат ва жамият ўртасида кўприк вазифасини бажариб, жамоатчилик фикрини ўрганиш ва ахборот сиёсати учун масъул бўлади. Бундай масъулиятли вазифаларни бажаришда унга аввалги лавозимларида тўплаган тажрибалари катта ёрдам бериши аниқ.
Хулоса ўрнида айтишимиз мумкинки, айнан халқ дардига қулоқ тутиш, халқ билан мулоқот президент Шавкат Мирзиёев томонидан устувор вазифа сифатида белгилаб ўтилган. ОАВга сўнгги йилларда берилган эркинлик, жумладан Саида Мирзиёева раҳбарлигида Миллий масс-медиани қўллаб-қувватлаш ва ривожлантириш жамоат фонди томонидан амалга оширилган бу борадаги ишларнинг натижасини пайқаш қийин эмас. Шунга қарамай қилиниши керак бўлган ишлар ҳали етарли. Саида Мирзиёеванинг нодавлат ташкилотидан давлат ташкилотига ўтиши эса ушбу ўзгаришларни янада жадаллаштириш имконини беради.
Изоҳ (0)