Қарши туманининг собиқ ҳокими Мақсуда Мустафоева мактаб директори сифатида иш бошлади

Қарши туманининг собиқ аёл ҳокими Мақсуда Мустафоева Қарши шаҳридаги мактабларнинг бирида директор сифатида иш бошлади. Бу ҳақдаги хабарни вилоят халқ таълими бошқармаси ахборот хизмати тасдиқлади.

Маълум қилинишича, собиқ ҳоким Қарши шаҳридаги 11-сонли мактабда раҳбар сифатида иш бошлаган.

Қарши туманини салкам икки йил бошқарган Мақсуда Мустафоева ҳокимликка киришганидан бир ой ҳам ўтмасдан, президент ишонч билдирган кластерни тугатиш ташаббуси билан чиқиб, кўпчилик эътиборига тушган бўлса, тадбиркорни туман учун боғча ёки мактаб қуриб бермасликда айблаши ортидан кўплаб муҳокамалар сабабчиси бўлишга ҳам улгурганди. Кейинчалик тадбиркор билан судлашишни бошлаган ҳоким тадбиркорни телефон қўнғироқларига жавоб бермасликда айблади.

Юз миллион сўмлик саховат пулларининг еб кетилиши ортидан яна интернетда кўриниш берган Мақсуда Мустафоева вилоятнинг собиқ ҳокими Зоир Мирзаевнинг афсусига ҳам сабаб бўлганди. Журналист ва блогерлар билан суҳбатлашган Зоир Мирзаев Мақсуда Мустафоева ҳақида гапириб, «Барчада хато ва камчиликлар бўлади, албатта. Раҳбар сифатида буни танқид қиламан. Яқинда Қарши тумани ҳокими билан суҳбатлашиб, камчиликларини кўрсатдим. Мен бошида унинг ишини кўрмасдан, ҳокимликка тавсия берганимни хатойим деб биламан», — деганди.

«Дарё» манбаси 2022 йилнинг 2 февраль куни давлат раҳбари Шавкат Мирзиёев раислигида видеоселектор йиғилиши ўтказилганини, унда президент кўплаб туман ҳокимларининг иш фаолиятидан қониқмаётганини айтиб, Қашқадарё вилоятининг ягона аёл ҳокимини ишдан олганини ва бу бошқаларга «дарс» бўлиши кераклигини таъкидлаганини билдирганди. Шундан бери Мақсуда Мустафоева ишсиз эди.