Эрон ўзининг Россия билан ҳамкорлиги чуқурлашганини, кучайганини намойиш қилмоқчи. Бу ҳақда Урушни тадқиқ қилиш институти (Институте фор тҳе study оф wар — ISW) таҳлилчилари фикр билдирмоқда.
Айнан шунинг учун ҳам Эрон ҳукумати томонидан назорат қилинувчи ОАВлар Россия Хавфсизлик кенгаши котиби Николай Патрушевнинг ташрифи ҳақида хабар берган (Россия унинг ташрифини тасдиқлаганича йўқ).
Экспертлар тахмин қилишича, гап халқаро аудитория эътиборини Москва ва Теҳрон ўртасидаги ҳамкорик кучайганига қаратиш, шунингдек, россиялик амалдор Украинадаги урушда ёрдам сўраб Эронга мурожаат қилганини ноошкорона таъкидлаш ҳақида бормоқда.
Аввалроқ Эроннинг IRNA агентлиги Теҳронга Патрушев етиб келгани ҳақида хабар берганди. Уни Эронга мамлакат Миллий хавфсизлик олий кенгаши котиби адмирал Али Шамхоний таклиф қилган. Патрушев нафақат адмирал билан, балки Эрон ҳукуматининг бошқа вакиллари билан учрашувлар ўтказиши режалаштирилган, деб ёзди IRNA. Россия Хавфсизлик кенгаши котибига бошқа мансабдорлар ҳам ҳамроҳлик қилаётгани айтилган.
Урушни тадқиқ қилиш институти таҳлилчиларига кўра, Патрушев Эрондан баллистик ракеталар сотиб олиш эҳтимолини муҳокама қилиш учун келган.
Эрон ва Россия бир неча ойлар давомида Теҳрон Москвага жанговар учар қурилмалар етказиб берилаётганини, улар эса кейин Украинада қўлланилаётганини рад этиб келди. 5 ноябрь куни Эрон ташқи ишлар вазири биринчи марта Россияга дронлар юборилаётганини тан олди, бироқ бу Украинага ҳужумдан аввал юз бергани ва гап «кам миқдордаги» дронлар ҳақида борганини маълум қилди.
Маълум бўлишича, Россия ҳукумати дронлар партияси эвазига Эронга нақд валюта ва Украинада қўлга киритилган Ғарб қурол-яроғлари намуналарини юборган.
Изоҳ (0)