Twitter’ни сотиб олганидан кейин Илон Маскнинг бойлиги 70 млрд долларга камайди

Илон Маскнинг бойлиги, у апрель ойида Twitter ижтимоий тармоғини сотиб олиши ҳақида эълон қилганидан буён, 70 миллиард долларга камайди, деб ёзади Reuters.

Forbes’нинг реал вақт давомида янгиланиб туриладиган миллиардерлар рейтингига кўра, 8 ноябрь куни Маскнинг бойлиги 200 миллиард долларлик маррадан пастга тушган.

Бу унинг электромобиллар ишлаб чиқарувчи Tesla компанияси акциялари курси пасайгани билан боғланмоқда. Маск энди Twitter’ни ривожлантиришга кўпроқ эътибор бера бошлаганидан хавотирга тушган инвесторлар Tesla акцияларини сотиб юбормоқда. Натижада Tesla ўз бозор қийматининг қарийб ярмини йўқотди, у айни пайтда 622 миллиард долларни ташкил этмоқда.

Шунга қарамай, Илон Маск ҳамон дунёдаги энг бадавлат одам бўлиб қолмоқда — у ўзидан кейинги поғонада турган LVMH компанияси эгаси Бернар Арнони салкам 40 миллиард долларга ортда қолдирмоқда.

Маск Twitter’ни сотиб олиш бўйича битимни 27 октябрь куни ёпганди, компания учун эса 44 миллиард доллар тўлаганди.