Россия ҳукумати дронлар партияси эвазига Эронга нақд валюта ва Украинада қўлга киритилган Ғарб қурол-яроғлари намуналарини юборган. Бу ҳақда Sky News хавфсизлик хизматларидаги манбасига таяниб хабар бермоқда.
Британия телеканали суҳбатдоши берган маълумотларга кўра, 20 август куни эрта тонгда Теҳрон аэропортига Россия самолёти учиб келган, у ўзи билан 140 миллион евро нақд пул, шунингдек, Британиянинг NLAW танкка қарши ракетаси, Американинг Javelin танкка қарши ракета мажмуаси ва Stinger зенит-ракета мажмуасидан иборат қурол-яроғларни олиб келган.
Қўлга киритилган қурол-яроғ Эроннинг Ислом инқилоби посбонлари корпусига бўлғуси урушларда фойдаланиш учун Ғарб технологияларини ўрганиш ва улардан нусха олиш имконини беради, деб ҳисоблайди Sky News манбаси.
Бунинг эвазига Москва Эрондан 160 дан ортиқ учувчисиз учар қурилмалар, шу жумладан 100 та Shahed-136 камикадзе-дронларини олган.
Кейинги бир неча кун давомида Москва ва Теҳрон 200 миллион евролик дронларни етказиб бериш ҳақида яна бир олди-сотди битимини келишиб олган, дея даъво қилмоқда канал манбаси.
Эрон ва Россия бир неча ойлар давомида Теҳрон Москвага жанговар учар қурилмалар етказиб берилаётганини, улар эса кейин Украинада қўлланилаётганини рад этиб келди. 5 ноябрь куни Эрон ташқи ишлар вазири биринчи марта Россияга дронлар юборилаётганини тан олди, бироқ бу Украинага ҳужумдан аввал юз бергани ва гап «кам миқдордаги» дронлар ҳақида борганини маълум қилди.
Изоҳ (0)