«Дарё» нашри 7 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Макрон Путиннинг Хиросимага ташланган бомба ҳақидаги сўзларидан хавотирга тушди
Россия президенти Владимир Путин франциялик ҳамкасби Эммануэль Макрон билан суҳбатда Иккинчи жаҳон уруши охирида Хиросима ва Нагасакига атом бомбалари ташланганини эслатиб ўтган, бу эса Макронни жиддий ташвишга солган, деб ёзмоқда Daily Mail дипломатик манбаларга таяниб.
Манбаларнинг айтишича, Путин суҳбатда Япониянинг ушбу шаҳарларида ядро қуролидан фойдаланиш Япониянинг таслим бўлишига ва Иккинчи жаҳон уруши тугашига олиб келгани ҳақида фикр билдирган.
«Ғалаба қозониш учун йирик шаҳарларга ҳужум қилиш шарт эмас», — деган у.
«Макрон қаттиқ хавотирга тушди. Бу Путин Киевга тегмасдан Украина шарқида тактик ядро қуролини қўллаши мумкинлигига жуда жиддий ишора бўлиб туюлди», — деди манбалардан бири.
Кремль хабарларига кўра, Путин ва Макрон охирги марта 11 сентябрь куни телефон орқали гаплашган. Ўшанда Россия президенти, хусусан, «Украинанинг Запорожье атом электр станцияси объектларига, жумладан, ҳалокатли оқибатларга олиб келувчи радиоактив чиқиндиларни сақлаш омборига мунтазам ҳужумлари»га эътибор қаратган.
Ғарб мамлакатлари Москва ва Киев ўртасида ярашувга эришиш йўлларини ўзаро муҳокама қилмоқда
Ғарб мамлакатлари вакиллари Россия ва Украина ўртасидаги ярашувнинг эҳтимолий шартлари ҳақида ўзаро фикр алмашмоқда, деб ёзади The Wall Street ўз манбаларига таяниб. Айни пайтда ушбу давлатлар расмий етакчилари ва мансабдорлари «Украинани боши берк кўчага киритиб қўйиши мумкин бўлган» баёнотлардан қочишга ҳаракат қилмоқда.
Халқаро алоқалар бўйича Европа кенгаши Варшава идораси раҳбари Петр Бураснинг сўзларига кўра, ҳозир Ғарбда «якуний сулҳ қандай кўринишга эга бўлиши ҳақида аниқ тасаввур йўқ». «Берлин, Париж ёки Вашингтон Киевни Зеленский Украина манфаатларига тўғри келмайди деб ҳисоблайдиган бирор нарсага ундайди, деб ўйламайман», — деди таҳлилчи.
WSJ ёзишича, Ғарб мансабдорлари мамлакатлар ўртасида тинч йўл билан тартибга солиш масаласида келишмовчиликлар чиқиши мумкин, айниқса, Украина Россияга қарши чиқишда давом этиб, Қримни қайтариб олишга уринадиган бўлса.
Ҳозир, деб ёзади нашр дипломатларга таяниб, Вашингтон ва унинг иттифоқдошлари Украинада музокаралар йўли билан жанговар ҳаракатларни тўхтатиш истиқболларини кўрмаяпти. АҚШ ва Европа мамлакатлари ҳукуматлари фикрича, Россиянинг хатти-ҳаракатлари бунга имконият яратмайди, балки вазият кескинлашувига олиб боради, деб ёзади газета.
Байденнинг маслаҳатчиси Путинга яқин одамлар билан Украина ва ядровий қуроллар ҳақида яширин музокаралар олиб борган — WSJ
Сўнгги ойларда АҚШ миллий хавфсизлик бўйича маслаҳатчиси Жейк Салливан Россия президентининг ёрдамчиси Юрий Ушаков ва Россия Хавфсизлик кенгаши котиби Николай Патрушев билан бир неча марта махфий музокаралар ўтказган. Бу ҳақда The Wall Street Journal нашри АҚШ расмийлари ва уларнинг иттифоқчилари орасидаги манбаларига асосланиб хабар бермоқда.
Газета суҳбатдошларига кўра, бу мулоқотлардан мақсад Украинадаги урушни бартараф этиш эмас, балки кескинлашувнинг олдини олиш ва мамлакатлар ўртасидаги алоқа каналларини қўллаб-қувватлаш бўлган.
Бундан ташқари, нашрнинг ёзишича, Салливан Украина раҳбариятини Россия билан музокараларга тайёрлигини ошкора эълон қилишга чақирган. Аввалроқ The Washington Post газетаси ҳам АҚШ президентининг маъмурияти Киевга шундай сўров юборгани ҳақида хабар берганди. Салливаннинг матбуот котиби журнал маълумотларига изоҳ бермади.
Оқ уйнинг охирги пайтлардаги баёнотларида АҚШ президенти маслаҳатчиси Россия расмийлари билан музокаралар олиб боргани ҳақида гап йўқ. Айни вазиятда Кремль ҳам сўровга жавоб бермаган.
АҚШнинг бир қатор расмийлари Салливан АҚШ маъмурияти аъзолари ичида Россия билан алоқаларни қўллаб-қувватлаш бўйича танилганини айтса, бошқа юқори мартабали сиёсатчилар Москва билан ҳозирги дипломатик ва ҳарбий шароитларда музокаралар самарали бўлмайди, деб ҳисобламоқда.
«Туркий давлатлар ташкилотининг Самарқанд саммитида 10 дан ортиқ ҳужжат имзо учун киритилмоқда»— Шерзод Асадов
«11 ноябрь куни Самарқандда Туркий давлатлар ташкилотининг биринчи саммити бўлиб ўтади (ушбу олий даражадаги тадбир 2021 йил Истанбул учрашувида Ташкилот номи ўзгаргандан кейинги Биринчи саммит ҳисобланади).Тадбирда 5 та аъзо мамлакат — Ўзбекистон, Туркия, Озарбайжон, Қозоғистон, Қирғизистон ҳамда 2 та кузатувчи - Туркманистон ва Венгрия мамлакатлари раҳбарияти иштирок этиши кутилмоқда.
Маълум қилинишича, Ташкилот доирасида сиёсий-иқтисодий, транспорт, маданият ва туризм каби соҳаларда ҳамкорликни янада жадаллаштириш масалалари муҳокама қилинади. Бундан ташқари халқаро ва минтақавий масалалар юзасидан фикр алмашилади.
Самарқанд саммитида 10 дан ортиқ ҳужжат имзо учун киритилиши режалаштирилмоқда. Тадбирнинг асосий ҳужжати бу — аъзо мамлакатларнинг энг муҳим минтақавий ва глобал муаммолар бўйича мужассамлашган позициялари ўз ифодасини топган Туркий давлатлар ташкилоти Самарқанд саммити декларациясидир. Унда минтақавий барқарорлик, хавфсизлик ва барқарор иқтисодий ривожланишни таъминлаш, транспорт алоқаларини мустаҳкамлаш, шунингдек, маданий мулоқотни чуқурлаштириш бўйича қўшма ёндашувлар белгилаб берилган.
Изоҳ (0)