G‘arb mamlakatlari Moskva va Kiyev o‘rtasida yarashuvga erishish yo‘llarini o‘zaro muhokama qilmoqda — OAV

G‘arb mamlakatlari vakillari Rossiya va Ukraina o‘rtasidagi yarashuvning ehtimoliy shartlari haqida o‘zaro fikr almashmoqda, deb yozadi The Wall Street o‘z manbalariga tayanib. Ayni paytda ushbu davlatlar rasmiy yetakchilari va mansabdorlari “Ukrainani boshi berk ko‘chaga kiritib qo‘yishi mumkin bo‘lgan” bayonotlardan qochishga harakat qilmoqda.

Xalqaro aloqalar bo‘yicha Yevropa kengashi Varshava idorasi rahbari Petr Burasning so‘zlariga ko‘ra, hozir G‘arbda “yakuniy sulh qanday ko‘rinishga ega bo‘lishi haqida aniq tasavvur yo‘q”. “Berlin, Parij yoki Vashington Kiyevni Zelenskiy Ukraina manfaatlariga to‘g‘ri kelmaydi deb hisoblaydigan biror narsaga undaydi, deb o‘ylamayman”, — dedi tahlilchi.

WSJ yozishicha, G‘arb mansabdorlari mamlakatlar o‘rtasida tinch yo‘l bilan tartibga solish masalasida kelishmovchiliklar chiqishi mumkin, ayniqsa, Ukraina Rossiyaga qarshi chiqishda davom etib, Qrimni qaytarib olishga urinadigan bo‘lsa.

Hozir, deb yozadi nashr diplomatlarga tayanib, Vashington va uning ittifoqdoshlari Ukrainada muzokaralar yo‘li bilan jangovar harakatlarni to‘xtatish istiqbollarini ko‘rmayapti. AQSH va Yevropa mamlakatlari hukumatlari fikricha, Rossiyaning xatti-harakatlari bunga imkoniyat yaratmaydi, balki vaziyat keskinlashuviga olib boradi, deb yozadi gazeta. Bundan tashqari, WSJ ma’lumotlariga ko‘ra, Parij va Berlin jangovar harakatlar boshlanishidan oldin tinchlik bitimlari haqidagi takliflarni muhokama qilib, nizoning ilk haftalarida Rossiya hukumati bilan muntazam aloqada bo‘lib turganidan keyin, Yevropa mamlakatlari “shtatdan tashqari diplomatiya” borasida xavotirga tushgan.

Gazeta G7 mamlakatlarining 4-noyabrdagi bayonotini eslatdi, unda “Rossiyaning muzokaralarga da’vatlari ishonch uyg‘otmasligi” aytiladi. Shuningdek, nashr eslatishicha, AQSH kongressi quyi palatasidan bir guruh demokratlar prezident Jo Baydenga yo‘naltirilgan, nizoga diplomatik yechim izlash, sanksiyalarni yumshatish va Moskva bilan muzokaralar o‘tkazishga chaqiruvchi xatini qaytarib olgan edi.

Biroq 6-noyabr kuni The Washington Post manbalari Bayden ma’muriyati shaxsiy tartibda Ukraina rahbariyatini Rossiya bilan muzokaralarga ochiqlikni namoyish qilish va prezident Vladimir Putin davrida muzokaralar o‘tkazishni istamaslikdan voz kechishga chaqirayotganini ma’lum qildi.

Bunday qarorni Zelenskiy DXR, LXR, Xerson va Zaporojye viloyatlarining Rossiyaga qo‘shilishi haqidagi referendumlardan keyin qabul qilgan edi. Rossiya hukumati esa muloqot davom etishiga umid qilayotganini aytmoqda. Oktabr oxirida Putin “Vashingtonda bu siyosatni amalga oshirayotganlar” Ukraina hukumatiga signal berib, “ular o‘z pozitsiyasini o‘zgartirishi va bu muammolarni tinch yo‘l bilan hal qilishga intilishi kerakligi”ni aytishi lozim, degan edi.