Фарғонадаги 15 ёшли ўсмир ўлимида 8 нафар вояга етмаган болалар гумонланаётгани маълум бўлди

Фарғона вилоятининг Қўқон шаҳридаги ИИБ биносидан 15 ёшли ўсмир боланинг мурдаси чиққани хабар берилганди. Ички ишлар вазирлиги ахборот хизмати раҳбари Шоҳрух Ғиёсовнинг «Дарё»га маълумот беришича, ўсмир йигит ўлимида гумонланаётганлар олти эмас, саккиз нафар болани ташкил қилади.

2022 йил 16 октябрь куни соат 21:30 да Бувайда тумани ИИБ ЖХХ HPБ ВЕМБ инспектор психологи лейтенант Р.Абдуллаев томонидан вояга етмаган Р.А. Вазирлар Маҳкамаси қарори билан тасдиқланган «Вояга етмаганларга ижтимоий-ҳуқуқий ёрдам кўрсатиш марказлари тўғрисида»ги низомга асосан назоратсиз қолганлиги аниқланган вояга етмаганларнинг шахсини аниқлаб, ота-онаси ёки уларнинг ўрнини босувчи шахсларга топшириш мақсадида тегишли ҳужжатлар расмийлаштирилиб, Фарғона вилояти ИИБ ЖХХ HPБ тасарруфидаги вояга етмаганларга ижтимоий ҳуқуқий ёрдам кўрсатиш марказига олиб келинган. Марказ ходимлари тарбиячи катта сержант Сарвар Эгамназаров ва тарбиячи катта сержант Иқболжон Якубов томонидан қабул қилинганида унинг ўнг кўзида қизариш излари борлиги аниқланиб, тегишли ҳужжатлар расмийлаштирилиб қабул қилинган. Ва марказнинг алоҳида хонасига жойлаштирилган, — дейилади вазирлик ахборотида.

Аниқланишича, 17 октябрь куни соат 09:00 да вояга етмаган Р.А. марказ ҳамшираси Ўлмасхон Турсунова томонидан тиббий кўрикдан ўтказилиб, соғлиғидан шикоят қилмаганлиги учун марказда тарбияланаётган ўғил болалар ётоқхонасига жойлаштирилган.

Шунда хонада бўлган тарбияланувчи вояга етмаган К.С. 15 ёшли ўсмир Р.А.дан қаердан эканлигини, нима сабабдан келганлигини сўраб устидан кулиб масхаралаган. Унинг бош қисмига қўли билан урган. Шундан сўнг хонадаги шериклари, 7 нафар вояга етмаган тарбияланувчилар — А.Э, М.А, А.Т, С.М, Қ.Н, Д.Д, ва Й,Д.лар ҳам боланинг дуч келган жойига қўли билан урган. С.К. бу билан кифояланмай, Р.А.нинг бўйнидан бўғиб, уч маротаба ҳушидан кетказган. Охирги маротаба бўғиб қўйиб юборган вақтда вояга етмаган бола ўзини бошқаролмай бош қисми билан полга йиқилган.

С.К. тушликдан сўнг ҳам ҳаракатини давом эттириб, Р.А.ни уришда давом этган. Вояга етмаган Э.А.га Р.А. уни онасидан сўкканлигини айтиб, ёлғон гапирган. Шунда вояга етмаган Э.А. марҳум боладан ҳақиқатдан ҳам сўкдингми деб сўраганида у ҳа деб жавоб берган. Кейин Э.А. Р.А.нинг бош қисмига бир неча маротаба урган, тепган ва унга тан жароҳати етказган. Ҳушини йўқотган 15 ёшли бола шифохонага олиб кетилаётган вақтида вафот этган, — дейилади масъуллар изоҳида.

Қўшимча қилинишича, мазкур ҳолат юзасидан Қўқон шаҳар прокуратураси томонидан Жиноят кодексининг 104-моддаси 3-қисми «д» банди (қасддан баданга оғир шикаст етказиш жабрланувчининг ўлишига сабаб бўлса) билан жиноят иши қўзғатилиб, тергов ҳаракатлари олиб борилмоқда.