«Ҳисоботларнинг ҳаммаси гўзал. Лекин ҳар йили муаммо юз берса, авария ҳолати бўлгандай югуриб юришади». Бобур Расулев газ, электр ва йўл муаммолари ҳақида гапирди

«Дарё» Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 5-сони мавзуси «Тошкент кўчалари» бўлиб, дастур меҳмони сифатида депутат, блогер Бобур Расулев таклиф этилди.

Лойиҳа меҳмони ҳар йили кузатиладиган табиат ҳодисаларига кутилмаган ҳолат сифатида қаралиши, газ, электр ва бошқа таъминотларда узилиш кузатилавериши, мутасаддилар эса ўз ишига етарли даражада масъулият билан ёндашмаслиги ҳақида гапирди.

Ёмғир ёғишини мисол қилиб олайлик. Нима, ёғингарчилик бўлишини олдиндан билиб бўлмайдими? Кейинги йил қиш келмайди, ёмғир ёғмайди, деган прогнозлар бўлмайди-ку!

Дренаж тизимлари бор, бир неча йил аввал шуларни амалга ошириш мақсадида ҳокимият томонидан маблағлар ажратилган, мақсадлар қўйилган. Лекин ҳар йили давом этадиган муаммолар бор: қиш келганда газ пасайиб кетади, электр ўча бошлайди. Бунга наҳотки тайёргарлик кўриб, маблағлар мақсадли сарфланишига масъулият сезишмайдими? Ҳисоботларнинг ҳаммаси гўзал. Лекин ҳар йили муаммо юзага келганда авария ҳолати бўлгандай югуриб юришади.

Агар ўз ташкилоти буни ҳал қилолмаса, бошқа ташкилотга мурожаат қилиши керак. Лекин негадир бундай қилишмайди, андиша дейишадими, қуда-андачилик ҳурматими ёки. Нима сабабдан давлат яратаётган тизимдан унумли фойдаланмайди?

Бу ерда, ўйлайманки, мутасадди ташкилотларнинг масъулияти етарли даражада эмас. Кўп омилларни санаш мумкин, мен 3-4 та сабаб кўраман бунда.

Биринчиси — мутахассисларнинг билими етишмаслиги. Ҳозирги технологик имкониятлардан хабардор эмас улар.

Иккинчиси — масъулиятдан қочиш. Раҳбарим нима дейди, деб ўйлайди. Раҳбар билан маслаҳатлашиш керак. Масъулиятни бошқаларга юклаб қўйиш кузатилади.

Яна бир нарсани айтмасликнинг иложи йўқ: коррупция ҳолатлари ҳам мавжуд. Ҳозирги кунда демократия тимсоли бўлган Очиқ бюджет, масалан. Бир вилоятда йўлни таъмирлаш учун ютиб олинган. Аммо у ер бориб текширилганда 1 сантиметр қалинликда асфальт ётқизилган. Ваҳоланки, ҳар бир нарсанинг тартиб-тамойи бор. Биз йўлшунос эмасмиз, лекин бундай бажариш мумкин эмаслигини тушунамиз. Айрим мутасаддилар сабаб пуллар ҳавога учиб кетяпти, — дейди Бобур Расулев.