Сурхондарё вилояти Узун туманидаги уйлардан бирида газ портлади. Бу ҳақда ФВВ матбуот хизмати хабар берди.
Маълум қилинишича, 19 октябрь куни соат 02:43 ларда «Меҳнат» МФЙ Сурхонбоши кўчасидаги уйлардан бирида ҳаво-газ аралашмасининг чақнаши содир бўлгани тўғрисида вилоят ФВБга хабар келиб тушган. Ҳодиса жойига ФВБ, ИИБ, ССБ ва бошқа тегишли идораларнинг куч ҳамда воситалари жалб қилиниб, вазият оқибатларини бартараф этиш бўйича ишлар олиб борилди.
Тахминларга кўра, уйнинг ертўласида бўлган маиший газ баллони редукторидан сизиб чиққан табиий газ хонага тўпланган ва ҳаво-газ аралашмаси чақнаши юзага келган.
Ҳодиса оқибатида хонада бўлган уй эгаси ва унинг фарзанди турли даражада куйиш тан жароҳатини олган, айни вақтда уларга зарурий тиббий ёрдам кўрсатилмоқда.
Ҳозирда ҳолат юзасидан суриштирув ишлари олиб борилмоқда.
Бундан аввал Бухоро вилоятининг Қоракўл туманидаги уйда газ портлаши оқибатида 8 ёшли бола вафот этгани ҳақида хабар берилган эди.
Изоҳ (0)