Хитой Тайванни эгаллаш учун куч ишлатишга тайёр. Бу ҳақда Хитой Коммунистик партияси вакили Сун Ели маълум қилди, деб ёзади Al Jazeera.
Сун Ели Тайваннинг Хитойга қўшилиши «ҳамма, жумладан, Тайван халқи манфаатига хизмат қилишини» айтди. Шунингдек, у Хитой тинч йўл билан бирлашишни афзал кўришини таъкидлади.
Коммунистик партия вакилининг айтишича, Хитой тайванлик сиёсатчиларнинг расман мустақилликка эришишга бўлган уринишларига, шунингдек, вазиятга уларнинг чет эллик тарафдорлари, жумладан АҚШнинг аралашувига тоқат қилмайди.
Тайван ҳудудида кескинлик юқорилигича қолмоқда.
Тайван атрофидаги зиддият
Шу йилнинг апрелида, америкалик конгрессменлар гуруҳи ташрифидан кейин Хитой ва Тайван атрофидаги вазият кескинлашди. Август бошида Тайванга Вакиллар палатаси спикери Нэнси Пелоси келганидан кейин кескинлик ўз чўққисига чиқди. Унинг ташрифи Хитой томонидан қаттиқ танқидга учради. У Тайванни ўз вилояти деб ҳисоблайди ва унинг Пекин дипломатик алоқада бўлган мамлакатлар вакиллари билан мулоқотларига қарши чиқади.Пелосининг ташрифига жавобан, Хитой Тайван яқинида ҳарбий машғулотлар ўтказди. АҚШ ХХРни сунъий инқирозни келтириб чиқаришда айблади ва Вашингтоннинг позицияси ўзгармагани, у ҳамон ягона Хитой сиёсатига амал қилишини таъкидлади. Тайван, ўз навбатида, Пекинни «мускулларини кўз-кўз қилишни» тўхтатишга чақирди.
Кескинлик кучайиши фонида Хитой 10 август куни «Оқ китоб»ни эълон қилди. Ушбу ҳужжат ҳар икки йилда янгиланади, унда мамлакатнинг миллий мудофаа стратегияси баён этилади. «Оқ китоб»нинг янги таҳририда Хитой Тайванни куч билан эгаллаб олиши мумкинлигини билдирди. Агар «ташқи аралашув кучлари» «қизил чизиқ»ни босиб ўтса, қатъий ҳаракатларга ўтиши ҳақида огоҳлантирди. Шунингдек, ушбу ҳужжатда Хитой «бир мамлакат, икки тизим» моделини таклиф қилди. Аммо Тайван бу ғояни рад этиб, «Тайван халқигина ўз келажагини ҳал қила олиши»ни айтди.
Аввалроқ АҚШ Марказий разведка бошқармаси Хитой Халқ Республикаси (ХХР) етакчиси Си Цзиньпин ўз ҳарбийларига 2027 йилга келиб Тайван устидан ҳарбий назорат ўрнатишга тайёрланишни топширганини маълум қилганди.
АҚШ президенти Жо Байден агар Хитой томонидан кенг кўламли ҳужум бўлса, АҚШ ҳарбийлари Тайванни ҳимоя қилишини айтди.
Изоҳ (0)