Ўзбекистон аҳолиси мамлакатга келаётган россияликларни нима учун хушламаяпти?

Россияда сафарбарлик бошлангандан буён Ўзбекистонга ҳам россияликларнинг оқими тинмаяпти. The Rambler нашри россияликлар маҳаллий аҳолини энг кўп нима юзасидан безовта қилаётгани ҳақида мақола эълон қилди.

Кўплаб россияликлар Ўзбекистонга жойлашди, чунки визасиз кириш мумкин. Аммо, маълум бўлишича, баъзи россияликлар маҳаллий аҳолини ғазаблантирмоқда. Сабаби — маданиятдаги фарқ. Масалан, ўзбеклар учун калта шим кийиш одат эмас.

«Кекса одамлар бор, сиздан катта бўлган ҳар қандай одам, таниш ёки қариндош бўлмаса ҳам, нафақат юмшоқ гаплашиш керак, балки катта одам пайдо бўлганда ўрнидан туриб, фақат сизлаб мурожаат қилиш лозим. Бизда болалар ота-оналари, ака-опаларини сизлайди. Шундай экан, бирор ёш йигит бозорда кекса аёлга мевани нотўғри ўраб берганини айтиб қичқирса, бу бошқаларнинг нигоҳига тушмай қолмайди», — дейди тошкентлик Гулзода.

Оқибатда меҳмонларнинг бундай хатти-ҳаракати ғазабга сабаб бўлади, гарчи ўзбекларда меҳмонларни самимий кутиб олиш одат тусига кирган бўлса-да. Аммо кўплаб россияликлар уйни ижарага олиб, аллақачон меҳмон мақомини йўқотиб, тўлиқ маҳаллий аҳолига айланган.

Қолаверса, россияликларнинг оқими уй-жой нархини оширди: агар илгари Тошкентда бир хонали квартирани ойига 200-300 долларга ижарага олиш мумкин бўлган бўлса, энди улар 600-700 доллар туради. Оқибатда маҳаллий талабалар ва вилоятлардан келган бошқа меҳмонлар уй-жойсиз қолди.

«Уйимда ёш келинлар, невараларимнинг рафиқалари, чевараларим, турмушга чиқмаган неварам, кўплаб аёллар ва болалар яшайди. Қўшни эса уйини россиялик уч кишига ижарага берибди. Балки яхши йигитлардир. Бироқ дўконга чиққандаги ҳолатларини кўрсангиз, уят! Уларни оиламдаги аёллар, болалар кўришидан уяламан, эркаклар ҳам» – дейди 92 ёшли Жумабой.

Яна бир вазиятда россиялик киши маҳаллий ҳомиладор аёллардан бирига дўкондаги навбат борасида қўполлик кўрсатган. Воқеага аралашган 35 ёшли ўзбек эркакни эса «чебурек» деб атаган.

Умуман олганда, ўша вазиятда маданиятлараро можаро деярли юзага келган, Тошкентда узоқ вақт яшаб келаётган рус киши кескинлашувнинг олдини олган. У россияликларга чет элда маҳаллий қоидаларга мувофиқ яшаш ва маҳаллий урф-одатларни ҳурмат қилиш кераклигини эслатган.