Россия ва Туркия президентлари Владимир Путин ва Ражаб Тоййиб Эрдўғон 13 октябрь, пайшанба куни Остонада учрашади, бу ҳақда Россия президенти матбуот котиби Дмитрий Песковга таяниб, «Интерфакс» хабар бермоқда.
Муҳокама қилинадиган мавзулар орасида Украина, шунингдек, Москва ва Анқара ўртасидаги икки томонлама алоқалар бор, деди у.
Москва ва Ғарб ўртасида Украина бўйича музокараларда воситачиликни таклиф қилиш учун Эрдўғон Путин билан Остонада учрашишини Туркия етакчисининг расмий вакили Иброҳим Калин ҳам маълум қилди.
«Президент Эрдўғон Путин билан Украинада ўт очишни тўхтатиш режимига эришиш учун биз кўришимиз мумкин бўлган чораларни, бизнинг истиқболларимизни муҳокама қилади», — деди Калин.
Икки томонлама учрашув 13 октябрь куни Осиёда ҳамкорлик ва ишонч чоралари саммитида бўлиб ўтиши кутилмоқда.
Сентябрь охирида Эрдўғон россиялик ҳамкасби Владимир Путинни Украина атрофидаги кескинликни камайтириш ва Украина донини олиб чиқиш бўйича келишувни узайтириш учун қадамлар ташлашга чақирганди. Шунингдек, Эрдўғон, ДХР, ЛХР, Запорожье ва Херсон вилоятларидаги референдумлар масаласига тўхталиб, Путинга тинчликка яна бир имконият беришни таклиф қилганди.
Туркия Россиянинг Украинага ҳужуми бошланганидан кейин улар ўртасида кўп марта воситачилик қилган. Хусусан, «дон келишуви» Туркия иштирокида тузилган бўлиб, у Украина портларидан дон импорт қилишни бошлаш имкониятини берганди. Шунингдек, Россия ва Украина ўртасида асирлар алмашинувидан кейин, «Азов» полки командирлари Туркияга юборилганди.
Эрдўғоннинг ўзи ҳам Россия, ҳам Украина билан «очиқ мулоқот» олиб бораётган ягона етакчи эканини таъкидлаганди.
Изоҳ (0)