Украина урушда кетма-кет муваффақиятларга эришганидан кейин, кескин бурилиш нуқтасига етиб келинган, у низонинг қаттиқ кучайиб кетиши хавфини юзага келтиради. АҚШ президенти Жо Байден маъмуриятидагилар шундай фикрни билдирмоқда.
«Биз урушда потенциал кескин бурилиш нуқтасида турганимизни, албатта, тушунамиз, — деди Байден маъмуриятининг юқори мансабли вакили The Washington Post нашрига. — Украина, шубҳасиз, сўнгги вақтларда катта муваффақиятларга эришди ва тажовузкорроқ бўлди, Путин эса жанг майдонида ҳам, уйда ҳам, хорижда ҳам қизғинликни ҳис қилмоқда».
Нашр суҳбатдошининг сўзларига кўра, бу хавфли вазиятдир. «Урушда кескин бурилиш пайтлари одатда хавфли бўлади. Девор ортидан нима чиқишини олдиндан билиб бўлмайди», — деди у.
Украина билан зиддиятдаги кескин бурилиш нуқтаси ҳақида Россия расмий шахслари ҳам айтмоқда. «Бугунги кундан Россия махсус ҳарбий операциянинг янги босқичига киришди, — деди Федерация кенгашининг мудофаа ва хавфсизлик қўмитаси раҳбари Виктор Бондарёв 10 октябрь куни. — Энди янада қатъийроқ ҳаракат қиламиз».
10 октябрдан бошлаб Россия Украинанинг фуқаролик инфратузилмасига, шу жумладан, энергия объектларига ёппасига ракета зарбалари бермоқда. Сентябрь охирида эса Владимир Путин сафарбарлик эълон қилиб, «қўл остимиздаги барча воситаларни ишга соламиз», деганди. Кузатувчилар бу гапларда ядро қуролини қўллаш эҳтимолига ишорани кўрди.
Сафарбарлик ва ядровий таҳдидлар, Байден маъмуриятининг юқори мансабли вакили айтишича, «иккита нарсага ишора қилган: Путин қанчалик ёмон иш қилаётганини ҳақиқатан ҳам билади… Аввал бу шубҳа остида эди». «Иккинчидан, бу у ставкани икки баробар ошираётганидан далолат беради. Яъни биз урушнинг охирига яқин эмасмиз, музокараларга ҳам яқин эмасмиз. Бу воқеликлар бу ерда ҳеч кимни тинчлантирмайди», — деди мансабдор.
Изоҳ (0)