АҚШ президенти Жо Байден Индонезиядаги G20 саммитида Россия етакчиси Владимир Путин билан учрашишдан маъно кўрмади.
«Қаранг, у жуда шафқатсизларча иш тутди. У ҳарбий жиноятлар қилди, деб ўйлайман. Ҳозир у билан учрашувдан ҳеч қандай маъно кўрмаяпман», — деди у CNN телеканалига берган интервьюсида.
Байденнинг сўзларига кўра, учрашув ҳақидаги қарор Путин нима ҳақида гаплашмоқчи эканлигига боғлиқ бўлади. Масалан, агар Путин наркотиклар контрабандасида айбланаётган баскетболчи Бритни Гринерни айирбошлашни муҳокама қилмоқчи бўлса, у суҳбатга рози бўлади.
Америка етакчиси таъкидлашича, Россия билан унинг таркибига кирган янги ҳудудлар — ДХР, ЛХР, Херсон ва Запорожье вилоятлари устидан назоратни сақлашни муҳокама қилиб ўтирмайди.
Бу масалани у G7 мамлакатлари етакчилари билан кўриб чиққан. «Бизнинг позициямиз: Украинасиз Украина ҳақида гапирмаслик. Шундай экан, мен бошқалар каби, Россия билан уларнинг Украинада давом этаётган иштирокини, Украинанинг қайсидир қисмини сақлаб қолишни муҳокама қилишга тайёр эмасман», — деди Байден.
G20 саммити 15—16 ноябрь кунлари Индонезияда ўтказилиши керак. Индонезия ташқи ишлар вазири Ретно Марсуди Россия ва Украина президентлари саммитда қатнашишини маълум қилди.
Аввалроқ АҚШ президенти Жо Байден G20 етакчиларининг навбатдаги йиғилишида Россия президенти Владимир Путин билан учрашишни истисно қилмаган эди.
Россия ташқи ишлар вазири Сергей Лавров эса агар АҚШ томонидан таклиф киритилса, Кремль G20 саммитида Россия ва Америка президентларининг учрашиш имкониятини кўриб чиқишга тайёрлигини билдирди.
Украина президенти Владимир Зеленский G7 мамлакатлари етакчиларининг онлайн учрашувида кескин нутқ сўзлаб, G7 давлатлари раҳбарларини Россиянинг амалдаги раҳбари билан ҳеч қандай мулоқот бўлиши мумкин эмаслиги борасидаги аниқ ҳақиқатни тан олишга чақирди, чунки Россия раҳбарининг ўзи Украинанинг йиллар давомида тинчлик музокараларини ўтказишга уринишларига қарамай, мулоқотни рад этган.
G20 саммити (энг ривожланган ва ривожланаётган иқтисодиётига эга мамлакатлар, жумладан, Европа Иттифоқи давлатлари, АҚШ, Россия, Хитой, Буюк Британия, Бразилия, Саудия Арабистони ва бошқаларни бирлаштиради) 15—16 ноябрь кунлари Балида бўлиб ўтади. Индонезия апрель ойида G20 етакчиларига таклиф юборган. Украина ассоциацияга аъзо бўлмаса-да, тадбирга президент Владимир Зеленский ҳам таклиф этилган.
Изоҳ (0)