AQSH prezidenti Jo Bayden Indoneziyadagi G20 sammitida Rossiya yetakchisi Vladimir Putin bilan uchrashishdan ma’no ko‘rmadi.
“Qarang, u juda shafqatsizlarcha ish tutdi. U harbiy jinoyatlar qildi, deb o‘ylayman. Hozir u bilan uchrashuvdan hech qanday ma’no ko‘rmayapman”, — dedi u CNN telekanaliga bergan intervyusida.
Baydenning so‘zlariga ko‘ra, uchrashuv haqidagi qaror Putin nima haqida gaplashmoqchi ekanligiga bog‘liq bo‘ladi. Masalan, agar Putin narkotiklar kontrabandasida ayblanayotgan basketbolchi Britni Grinerni ayirboshlashni muhokama qilmoqchi bo‘lsa, u suhbatga rozi bo‘ladi.
Amerika yetakchisi ta’kidlashicha, Rossiya bilan uning tarkibiga kirgan yangi hududlar — DXR, LXR, Xerson va Zaporojye viloyatlari ustidan nazoratni saqlashni muhokama qilib o‘tirmaydi.
Bu masalani u G7 mamlakatlari yetakchilari bilan ko‘rib chiqqan. “Bizning pozitsiyamiz: Ukrainasiz Ukraina haqida gapirmaslik. Shunday ekan, men boshqalar kabi, Rossiya bilan ularning Ukrainada davom etayotgan ishtirokini, Ukrainaning qaysidir qismini saqlab qolishni muhokama qilishga tayyor emasman”, — dedi Bayden.
G20 sammiti 15—16-noyabr kunlari Indoneziyada o‘tkazilishi kerak. Indoneziya tashqi ishlar vaziri Retno Marsudi Rossiya va Ukraina prezidentlari sammitda qatnashishini ma’lum qildi.
Avvalroq AQSH prezidenti Jo Bayden G20 yetakchilarining navbatdagi yig‘ilishida Rossiya prezidenti Vladimir Putin bilan uchrashishni istisno qilmagan edi.
Rossiya tashqi ishlar vaziri Sergey Lavrov esa agar AQSH tomonidan taklif kiritilsa, Kreml G20 sammitida Rossiya va Amerika prezidentlarining uchrashish imkoniyatini ko‘rib chiqishga tayyorligini bildirdi.
Ukraina prezidenti Vladimir Zelenskiy G7 mamlakatlari yetakchilarining onlayn uchrashuvida keskin nutq so‘zlab, G7 davlatlari rahbarlarini Rossiyaning amaldagi rahbari bilan hech qanday muloqot bo‘lishi mumkin emasligi borasidagi aniq haqiqatni tan olishga chaqirdi, chunki Rossiya rahbarining o‘zi Ukrainaning yillar davomida tinchlik muzokaralarini o‘tkazishga urinishlariga qaramay, muloqotni rad etgan.
G20 sammiti (eng rivojlangan va rivojlanayotgan iqtisodiyotiga ega mamlakatlar, jumladan, Yevropa Ittifoqi davlatlari, AQSH, Rossiya, Xitoy, Buyuk Britaniya, Braziliya, Saudiya Arabistoni va boshqalarni birlashtiradi) 15—16-noyabr kunlari Balida bo‘lib o‘tadi. Indoneziya aprel oyida G20 yetakchilariga taklif yuborgan. Ukraina assotsiatsiyaga a’zo bo‘lmasa-da, tadbirga prezident Vladimir Zelenskiy ham taklif etilgan.
Izoh (0)