Украинанинг 1300 дан ортиқ шаҳар ва қишлоқлари Россиянинг энг йирик ҳаво ҳужумидан кейин электрсиз қолди

10 октябрь куни эрталаб берилган ракета зарбалари туфайли, Украинанинг камида 1307 та аҳоли пункти электрсиз қолди. Бу ҳақда мамлакат Фавқулодда вазиятлар давлат хизмати хабар берди.

Электр таъминоти Суми (766 та аҳоли пункти), Львов (353), Тернопол (169), Киев (13) ва Хмелницкий (6) вилоятларида узилган.

Фавқулодда вазиятлар давлат хизмати берган сўнгги маълумотларга кўра, 10 октябрь кунги ўққа тутишлар оқибатида 14 киши ҳалок бўлиб, 97 киши жароҳатланган.

Украина президенти Владимир Зеленский Россия қўшинлари бир кунда Украина шаҳарларига қарата 84 та ракета учирганини маълум қилди, шуларнинг 43 таси ҳаво ҳужумига қарши мудофаа тизими томонидан уриб туширилган. Бундан ташқари, шу куни Украинага 24 та учувчисиз учар қурилма ҳужум қилган, 13 таси уриб туширилган. Россия Мудофаа вазирлиги мудофаа, энергетика ва алоқа объектларига ҳужум қилинганини айтди, бироқ фуқаролик объектлари ҳам ўқлар ёмғири остида қолган. Reuters қайд этишича, бу уруш бошланганидан буён Россиянинг энг йирик ҳаво ҳужуми бўлган.

Энергетика инфратузилмасига ўқ ёғдирилгани ва зарар кўргани туфайли, Украина ўз энергия тизимини барқарорлаштириш учун 11 октябрдан Евроиттифоққа электр энергияси экспортини тўхтатиб туришга қарор қилди.

Россия президенти Владимир Путин 10 октябрь куни эрталаб Украина шаҳарларининг ўққа тутилиши Керч бўғозидаги Қрим кўпригида содир бўлган портлашга жавоб бўлганини айтди. Бироқ Украина президенти офиси маслаҳатчиси Михаил Подоляк ракета зарбалари Қрим кўпригидаги портлашга алоқаси йўқлигини таъкидлади. «Россия армиясининг Украина шаҳарларига йўналтирилган бугунги ракета зарбалари бир неча ҳафта олдин режалаштирилган ва Қрим кўпригидаги портлаш билан боғлиқ эмас», — деди Подоляк.