Тадбиркор ва инвестор, ДСТ Глобал инвестициявий фонди эгаси миллиардер Юрий Милнер Twitter орқали маълум қилишича, у оиласи билан 2022 йил ёзида Россия фуқаролигидан воз кечган. Бизнесменнинг вакили ушбу маълумотни Forbes журналига тасдиқлаган.
«Мен оилам билан 2014 йилда, Россия Қримни босиб олганидан кейин бутунлай бош олиб кетгандим. Шу йил ёзда эса Россия фуқаролигидан воз кечиш жараёнини расман якунладик», — деди бизнесмен.
Юрий Милнер 1999 йилда Исроил паспортини олиб, у ерда бир неча йил яшаган, сўнг АҚШга кўчиб кетган.
Forbes 2022 йилда Милнернинг бойлигини 7,3 миллиард долларга баҳолаганди. Бизнесмен журнал талқини бўйича энг бой россияликлар рўйхатида 15-ўринни эгаллаган.
Юрий Милнер, асли россиялик бўлган бошқа баъзи тадбиркорлар, масалан, Павел Дуров билан бир қаторда Forbes’дан уларни россиялик бизнесменлар деб атамасликни сўраганди.
Сентябрь бошида россиялик ва арманистонлик тадбиркор ва инвестор Рубен Варданян Россия фуқаролигидан воз кечиб, тан олинмаган Тоғли Қорабоғ Республикасига кўчиб ўтганини маълум қилганди.
Шунингдек, июнь ойида Freedom Finance сармоя компанияси асосчиси Тимур Турлов Россия фуқаролигидан воз кечиб, Қозоғистон паспортини олганини маълум қилганди.
Изоҳ (0)