БМТ Бош ассамблеяси Донбасс, Харьков ва Запорожье вилоятларидаги референдумларни қораловчи резолюция лойиҳаси бўйича очиқ овоз бериш ўтказишни маъқуллади, деб ёзади «РБК».
Бундай таклиф билан Албания дипломатлари чиқди, 107 та давлат ташаббусни қўллаб-қувватлади, 13 таси қарши чиқди, яна 39 таси бетараф қолди.
Аввалроқ Россия овоз беришни яширинча ўтказишни таклиф қилганди, бундай ташаббус билан мамлакатнинг ташкилотдаги доимий вакили Василий Небензя чиққан . БМТ Бош ассамблеясида овоз беришни очиқча ўтказишда қарор қилишгач, у Россия томонидан қатъий норозиликни билдирди.
Небензя «аблаҳона фирибгарлик» юз берганини, унда Бош ассамблея вакили Чаба Кёрёши қатнашганини айтди. Россия вакилларига навбат бўйича сўз берилмади, дипломатларнинг нутқлари нотўғри талқин қилинди. Натижада Россия делегацияси овоз беришда қатнашмасликка қарор қилди, деди Небензя.
«БМТга аъзо мамлакатлардан ўз фикрини эркин ифодалаш ҳуқуқини тортиб олишга уринишмоқда», — деди у.
Россия доимий вакилининг фикрича, БМТ тарихида «бундай кўламда сурбетлик, зиддиятлар ва ҳозиргидек ўта хавфли қутблашув бўлмаган».
Небензя БМТ мамлакатларини ушбу ҳудудларда ўтказилган референдумлар натижаларини ҳурмат қилишга чақирди. АҚШ дипломатлари эса халқаро ҳамжамиятни Россия президенти Владимир Путиннинг хатти-ҳаракатларини қабул қилмасликларини намойиш қилишга даъват этди.
23—27 сентябрь кунлари Запорожье вилоятида, ЛХР, ДХР ва Херсон вилоятларида бўлгани каби, Россия таркибига кириш ҳақида референдум бўлиб ўтди. 30 сентябрь куни Кремлда ҳудудларнинг қўшилиши тўғрисидаги шартномаларни имзолаш маросими ўтказилди. 2 октябрь куни улар, тартиб бўйича, Конституциявий суд томонидан маъқулланди. 3 ва 4 октябрь кунлари шартномаларни ҳамда қўшилиш ҳақидаги федерал конституциявий қонунларни Давлат думаси ва Федерация кенгаши қўллаб-қувватлади. 5 октябрь куни эса президент имзоси қўйилган шартномаларни Кремль эълон қилди.
БМТ бош котиби ДХР, ЛХР ҳамда Херсон ва Запорожье вилоятларининг Россия қўшинлари назорати остидаги қисмлари Россия таркибига кириши юридик кучга эга бўлмаслигини айтганди.
Изоҳ (0)