Япониянинг жануби-ғарбий қисмида ўта кучли «Нанмадол» тайфуни яқинлашаётгани сабабли 2,5 миллионга яқин аҳолини эвакуация қилишга кўрсатма берилди.
Хусусан, Япониянинг Кюсю оролидаги Кагосима, Мияздаки ва Кумамото префектуралари аҳолисига уйларини тарк этиш айтилган. Эвакуация қилинганлар махсус марказларга жойлаштирилмоқда.
Япония метеорология бошқармаси маълумотларига кўра, тайфун 18 сентябрь куни тушгача Кагосима шаҳрига яқинлашиши керак. Бошқарма кучли шамол туфайли турар жой биноларининг қулаши мумкинлиги ҳақида огоҳлантирди. Одамларга хавфсиз бошпана топиш ва деразалардан узоқроқ туриш тавсия қилинди.
Кюсюнинг баъзи ҳудудларида шамол тезлиги 40 метр / секундга етмоқда, шунингдек, кучли ёмғир ёғмоқда. Синоптикларнинг фикрича, тайфун вақтида Сикоку оролида 500 миллиметргача, Кюсю шимолий ҳудудларида эса 400 миллиметргача ёғингарчилик ёғиши мумкин.
Кюсю жанубидаги тўлқинлар баландлиги ҳозирда 14 метрга етмоқда. Метеорология бюроси цунами ҳақида огоҳлантирмаган, бироқ «рекордни янгиловчи» кучли ёмғир ва шамол, шунингдек, баланд тўлқинлар ҳақида огоҳлантирган.
Reuters таъкидлашича, Япония ОАВлари «Нанмадол»ни шу мавсумда юз берган 14-рақамли тайфун деб атамоқда.
Изоҳ (0)